Cervo conmemora o Día Mundial do Alzheimer cunha charla informativa e xogos de estimulación da memoria
-Os actos terán lugar este venres, ás 18:00 horas, no salón de actos da Casa do Mar
Cervo, 18 de setembro de 2012-O Concello de Cervo quere sumarse á conmemoración, o 21 deste mes, do Día Mundial do Alzheimer. Con este motivo, a área de Servizos Sociais organizou unha serie de actividades que terán lugar este venres ás 18:00 horas no salón de actos da Casa do Mar.
A xornada arrincará cunha charla sobre o alzheimer e a figura do coidador, impartida por unha terapeuta ocupacional. En concreto, a especialista informará aos asistentes das características desta enfermidade, dos síntomas que se poden relacionar con ela ou como diferencialos dos que presentan outras demencias.
Ao mesmo tempo, a relatora dará consellos e pautas sobre os coidados e atencións que precisan os enfermos de alzheimer, que prácticas son recomendables e cales se deben evitar, ou cal é a actitude do coidador máis beneficiosa para o afectado. Tamén ofrecerá información sobre as distintas entidades ás que poden acudir as familias ou as axudas existentes. O público poderá formular preguntas que serán atendidas pola especialista.
Ademais, ao remate da charla, realizaranse xogos de estimulación da memoria, que serán de utilidade para incorporarse ás rutinas diarias de persoas que se atopen dentro dos grupos de risco.
A edil de Servizos Sociais, Pilar Armada, asegurou que “pretendemos que estas actividades sexan de utilidade para as familias e os enfermos co obxectivo de que dispoñan de información, tanto para axudar a detectar os síntomas e así favorecer un diagnóstico precoz como para mellorar a atención ás persoas enfermas”.
————–
Servizos Sociais abre o prazo para apuntarse nos cursos de memoria dirixidos a todas as parroquias
-As clases comezarán en outubro e consisten na realización de exercicios con temáticas atractivas para estimular a capacidade cognitiva do alumnado
Cervo, 18 de setembro de 2012-O Concello de Cervo abre o prazo de inscrición para os cursos de memoria que a Concellería de Servizos Sociais porá en marcha de novo no mes de outubro. En concreto, ofértanse cursos en todas as parroquias co obxectivo de que “todas as persoas que estean interesadas en acudir ás clases teñan a posibilidade de asistir na súa propia parroquia” explica a edil da área, Pilar Armada.
Os veciños e veciñas que desexen participar teñen que chamar por teléfono á Casa da Cultura (982 595 157) ou ao número 615 321 386 e dar os seus datos. Unha vez feita a inscrición, serán informados dos horarios e dos lugares nos que se impartirán as clases.
Estes cursos de memoria adoitan ter moi boa acollida por parte dos cervenses, interesados pola “utilidade das actividades que se realizan nas clases, que axudan a manter a mente activa e a estimular as súas capacidades cognitivas” explica Armada. Pero ademais “son cursos atractivos polo dinamismo co que se desenvolven, xa que son xornadas amenas e nas que é habitual que exista unha boa relación entre o alumnado” engade a edil.
O método utilizado para exercitar a mente consiste en realizar exercicios de matemáticas, de lingua e ortografía, relacionados cos animais ou mesmo pasatempos que entrega a mestra e o alumnado completa para despois ser corrixidos en grupo. A edil de Servizos Sociais anima a participar a “todos os cervenses que queiran pasar unhas horas coa mente esperta mentres comparten o seu tempo con outras persoas”. Armada fai un chamamento especial aos homes, “xa que en anos anteriores a súa presenza foi moi reducida a pesar de que son actividades moi beneficiosas para todos”.
A mostra sobre Mimina, que repasa a súa traxectoria vital e artística e o seu papel esencial na creación de Sargadelos como empresa cultural, amplía o seu período de apertura até o 12 de agosto grazas á cesión das instalacións por parte do Concello de Cervo. A exposición poderá visitarse todos os días de 12:00 a 14:00 e de 17:00 a 20:00, e tamén se poden concertar visitas noutros horarios ou para grupos chamando ao 636020514 (Lucía).
Durante tres días desfrutan dun programa intenso de actividades na natureza: montaxe e desmontaxe do campamento, surf en Esteiro, tiro con arco, xincana e diversos xogos. A iniciativa está promovida polas Concellerías de Xuventude e Deporte xunto coa Oficina de Información Xuvenil.
Olimpia López, supervisou hoxe en Cospeito un control da campaña de velocidade da DGT, que busca previr sinistros nun verán de maior tráfico. Lembrou que a velocidade inadecuada está presente no 22 % dos accidentes mortais e apelou á responsabilidade dos condutores: cada km/h conta para salvar vidas.
No Campo de Fútbol de As Valgas poderanse ver desde as 21.30 horas as actuacións de Netos de Bandim, chegados desde Guinea Bissau; da Philippine Performing Arts Company, das Filipinas; e do grupo anfitrión O Arco da Vella. Un encontro único de culturas, ritmos e emocións que promete unha noite inesquecible.
Estiveron acompañados polas técnicas de xuventude Mónica López Sanjurjo e Silvia Rodríguez Barreiro, para gozar das diferentes piscinas e tobogáns deste parque acuático. A viaxe estivo organizada polas Concellerías de Xuventude e Deporte e pola Oficina de Información Xuvenil dentro do programa Verán a Tope en Xove 2026.
O prólogo é da profesora de Debuxo Camino Casabella Pumares, artista con raíces no Alfoz do Castrodouro, que participará na presentación xunto ao presidente do colectivo. Cinco dos pintores estarán presentes no acto, xa que Alaxe faleceu hai tres anos. A portada do caderno é obra do ilustrador Xosé Blanco. O evento celebrarase o sábado 8 de agosto ás 20:00 horas no castelo do Castrodouro, en Alfoz do Castrodouro.
O evento, organizado pola Asociación Cultural Xuvenil O Castelo reuniu a numerosos veciños e visitantes e celebrouse durante catro días. A programación incluíu actuacións musicais, actos relixiosos, xogos tradicionais e unha comitiva da camións, coches e motocicletas que percorreron todas as parroquias deste concello mariñán.
