O alcalde do concello astur de Valdés interesouse en Burela polo funcionamento da fundación Eu Son

O ALCALDE DE VALDÉS INTERESÓUSE POLO FUNCIONAMENTO DA FUNDACIÓN EU SON, DO SEU CENTRO OCUPACIONAL E DO CENTRO DE DÍA. GONZÁLEZ BARCIA CONSIDERA MOI IMPORTANTE QUE O TRABALLO REALIZADO EN BURELA SEXA UN REFERENTE DENTRO E FORA DA NOSA COMUNIDADE AUTÓNOMA.

Burela, 6 de novembro de 2012. O alcalde de Burela, José Mª González Barcia, e a concelleira de Servizos Sociais, Diana Durán, mantiveron esta mañá un encontro co alcalde de Valdés, José Modesto Vallejo, e coa directora dun centro ocupacional para persoas con discapacidade, que funciona nese concello astur. O obxectivo desta xuntanza, que se celebrou en Burela, era coñecer o funcionamento da fundación Eu Son, do seu centro ocupacional e do seu centro de día.

O rexedor explicou que “hoxe pola mañá estivo en Burela o alcalde do municipio asturiano de Valdés, José Modesto Vallejo, acompañado da directora dun centro ocupacional para persoas discapacitadas similar ao que temos en Burela. Viñeron para coñecer precisamente a experiencia que se esta levando a cabo desde a fundación Eu Son, tanto no que se refire ao centro de formación ocupacional para discapacitados como ao centro de día”.

González Barcia contou que “a concelleira delegada de Servizos Sociais, Diana Durán, e máis eu explicámoslles cal fora o proceso polo se chegara á creación dunha fundación para levar a cabo unha actividade que o Concello de Burela empezara no ano 96 de cara á atención ás persoas discapacitadas. Expuxémoslles polo miúdo cal é o contido da fundación, como está organizada, como funciona o seu padroado, cales son os obxectivos que ten. Logo despois aproveitaron para visitar, xa in situ, as instalacións do centro de discapacitados, coñecer de forma directa como se traballa nel e, ao mesmo tempo, extraer conclusións que poidan aplicarse ao traballo que están facendo eles en Luarca”.

Para Diana Durán e José Mª González Barcia tildaron a visita de altamente satisfactoria, “polo que nos comentaron, fóronse moi contentos polo que viron, polas experiencias que hoxe tiveron aquí, en Burela, e para nosoutros evidentemente é unha satisfacción, como non podía ser doutra maneira, que o traballo que se está facendo desde a fundación Eu Son, desde o centro de formación ocupacional para discapacitados e desde o propio centro de día que se acaba de poñer en marcha hai un mes, sexa un referente para outros concellos incluso de fóra da nosa comunidade autónoma como é o caso de Valdés”.

O alcalde e a concelleira de Servizos Sociais amosáronse satisfeitos “porque vemos que o traballo que facemos está baseado na seriedade e no rigor. E non é que o digamos nosoutros é que hai persoas que veñen a aprender desta experiencia e que así o valoran”.

José Mª González Barcia aproveitou para felicitar ao persoal da fundación Eu Son e do centro de discapacitados, “porque sen dúbida ningunha eu creo que esta visita igual que aos responsables políticos nos enche de satisfacción maior aínda ten que ser a satisfacción que senten eles como profesionais cando ven que o seu traballo é valorado e tido en conta por outras administracións, por outros entes, que a través desa valoración intentan aplicar o que nosoutros estamos facendo precisamente aos seus centros e as súas propias experiencias”. O rexedor burelés considera que “isto serve tamén de maior acicate, si cabe, á hora de continuar traballando e pelexando para que o servizo que nosoutros prestamos sexa o mellor, aínda que somos conscientes de que queda moito camiño por andar. Pero o camiño andado tamén é importante, como mostra efectivamente esta visita que hoxe nos fixeron, que referenda o traballo feito ata a data”.