Burela xa licitou as obras a realizar con cargo ao Fondo Estatal

BURELA (FNC) .- O Concello de Burela xa licitou definitivamente as 15 obras que se realizarán nos vindeiros meses con cargo ao fondo estatal de inversión e que suporán un investimento de case 1.600.000 euros. O alcalde, Alfredo Llano, anunciou que “o vindeiro venres manteremos un encontro no Concello coas empresas que farán eses traballos para decidir cales serán os primeiros proxectos en executarse. Hai moitas desas obras que queremos ter listas antes de que empecen as festas de Burela. Trátase do pintado de rúas e da colocación de mobiliario urbano, ademais dalgunhas melloras que se acometerán no alumeado público. Comezaremos por aí e despois xa seguiremos co resto dos proxectos”.

Llano espera que “nun prazo duns tres meses todas estas obras estean rematadas”.

Xestión da auga

Por outra banda, o alcalde de Burela, ven de confirmar que foron catro as empresas que presentaron ofertas para facerse cargo da xestión da auga ó longos dos vindeiros 15 anos. Son: Aqualia, Gestagua, Espina y Delfín e Aquagest. Alfredo Llano sinala que “agora estamos no proceso de estudio e de valoración das ofertas que nos expuxeron, procurar facer todo con transparencia e coa máxima responsabilidade e agardamos que a finais de abril ou a principios de maio poidamos ter xa lista a concesión definitiva”.