Armada lémbralle ao PSOE que o único que fixo o bipartito pola Educación dos cervenses foi deixar o pavillón do CEIP Cervo nº1 á metade

A edil de Educación asegura que “a estrada que pasa diante do colexio de San Ciprián é da Deputación. Por iso, é lóxico que cando falamos de aparcadoiros nesa zona, a competencia é da Deputación. Iso enténdeo todo o mundo, menos o PSOE”.

Cervo, 28 de marzo de 2013-A edil de Educación, Pilar Armada, lembroulle hoxe ao grupo municipal socialista que “só hai un proxecto que lle temos que agradecer encarecidamente á Xunta bipartita: que partise en dous o pavillón do CEIP Cervo nº1”. “Tivemos que agardar ao cambio de goberno e á entrada de Alberto Núñez Feijóo na Xunta para que os nenos e nenas do colexio de San Ciprián puidesen contar cun pavillón completo” engade Armada.

Con estas palabras responde a delegada de Educación ás críticas dos socialistas que lle piden á Xunta que financie un aparcadoiro neste centro. “Cada día sorprendémonos máis da falta de memoria dos socialistas, que esquecen o moito que lle temos que agradecer a unha Xunta que tivo que vir a solucionar un problema que nos deixou o bipartito” como foi completar o pavillón, “no que o Goberno autonómico investiu 400.000 euros”. Un importe ao que hai que sumar outros proxectos e reformas en instalacións educativas levadas a cabo polo Executivo galego.

Ao mesmo tempo, a edil de Educación tamén lle aconsella aos socialistas “que utilicen algo máis a lóxica” xa que cando reclaman un aparcadoiro no CEIP Cervo nº1 á Xunta, “equivócanse de administración onde facer as súas reclamacións”. A estrada que discorre diante do colexio é da Deputación e, polo tanto, a única que ten competencias nesa zona de afectación”. “Iso enténdeo todo o mundo” engade. Deste xeito, Armada recoméndalles que, “se queren facer algo pola educación de Cervo e emendar a desfeita do pavillón, agora é o momento de que asuman as súas responsabilidades”.