Os socialistas instarán ó Pleno do Concello de Cervo a rexeitar o repago do servizo de comedor escolar

-Consideran esta medida da Xunta de Galicia como “repagamento xa que as familias xa pagan os seus impostos para garantir servizos básicos como é a educación”.

-A decisión do PP que afectará ós dous centros educativos do municipio “amosa unha vez máis que o goberno autonómico renuncia á progresividade fiscal e á idea de que paguen os que máis teñen”.

CERVO, 10 DE ABRIL. O Grupo Municipal Socialista vén de rexistrar unha moción co fin de que no vindeiro pleno do Concello de Cervo “a corporación manifeste o seu rexeitamento ó repagamento do servizo de comedor escolar que pretende establecer a Xunta de Galicia para o vindeiro curso”.

Entenden esta decisión como “repago, xa que as familias xa pagamos os nosos impostos para garantir os servizos básicos da cidadanía. Mentres atravesamos por un momento de dificultade económica para moitas familias, o PP ataca unha vez máis á clase traballadora. Unha familia con dous fillos tería que pagar no mes de abril do 2014 uns 198 euros”.

Os socialistas lembran que “non podemos esquecer que cando se falou de reunificación, prometeron servizo de comedor gratuito, buses e zonas de aparcamento, pero parece que todas esas promesas quedaron no aire”.

Esta medida que afectará a ambos colexios do Concello de Cervo pon de manifesto que “o goberno popular da Xunta de Galicia renuncia unha vez máis á progresividade fiscal e á idea de que paguen os que máis teñen. Debemos, entre todos, rexeitar esta medida e intentar que no vindeiro curso escolar acabe por non ser aplicada”.