Lugo 19 de abril de 2013.- O Grupo Provincial do Partido Popular denuncia que a Deputación de Lugo faga oídos xordos ás queixas dos alcaldes en relación ao mal funcionamento do seu programa estrela, o INNOVA-TE. Deste xeito, José Ramón Gómez Besteiro está a vender como “novos servizos”, prestacións que xa ofertara, cun pésimo resultado, en pasadas anualidades e sen “corrixir as deficiencias que estas presentan tal e como lle reclamaron reiteradamente os rexedores”.
Desta forma, os populares lembran que a Deputación Provincial está obrigado por lei a colaborar cos municipios e lamentan que o que parece “un acerto”, na práctica “estase a converter nun gran fracaso”. O ente provincial, segundo o puxeron de manifesto os rexedores locais, suspende na dotación de novas tecnoloxías aos concellos e especialmente no funcionamento do seu programa estrela, o que conleva a non rendibilización de fondos europeos.
Os populares xa denunciaron o pésimo funcionamento das actividades promovidas en torno ao INNOVA-TE, sendo “desaprobado” o programa polos municipios onde aseguran que o seu nivel de satisfacción “é moi mellorable”.
Tanto é así que os populares fan referencia a críticas como incidencias continuadas no rexistro telemático, páxinas web sen modernizar, supresión de internet no rural e mesmo PDAs para a lectura de contadores de auga que nunca chegaron a funcionar.
Ata o de agora, o pouco compromiso da Deputación Provincial de Lugo con algúns concellos da provincia a través do INNOVA-TE resúmese na simple instalación de pantallas de televisión nas entradas das Casas Consistoriais con información turística sobre a provincia de Lugo, chegando a non acenderse en algún caso.