O PSOE de Cervo afirma que o PP pretende deixar ó concello cun médico menos

CERVO, 7 DE XUÑO. Os socialistas non dan crédito ante as últimas novas sobre a recuperación do médico para o centro de saúde de Cervo, “van a substituír o médico de Cervo a costa de eliminar un facultativo do centro de San Cibrao”.

Ante esta medida, o Grupo Municipal Socialista vén de rexistrar unha solicitude co único fin de que “o señor alcalde, Alfonso Villares, non permita baixo ningún concepto esta decisión. Para que uns non perdan este servizo, non se lles ocorre outra brillante idea que sacárllelo ó resto. Preguntámonos qué trato é este cara os cervenses, que é ¿que segue habendo veciños de primeira e de segunda?”.

Neste senso, cren que como rexedor municipal “ten que responder por tódolos veciños igual, por todos e cada un deles, sen diferencia algunha entre parroquias. O único que vai conseguir é enfrontar ós veciños. Unha situación así sempre se debe evitar”.

Os socialistas subliñan que “o que sí parece unha realidade é que o Partido Popular ten prevista unha redución dos servizos sanitarios no noso concello, o que sí é unha realidade é que o concello vai ver mermada a calidade na atención médica e o que sí é unha realidade é que parece que nos queren facer pasar por tontos. Non imos consentir ningunha redución en materia de sanidade, temos todo o dereito a esixir que se manteñan os servizos tal e como estaban”.

Para rematar, lembran como hai uns días “puxemos sobre a mesa a nosa preocupación polo desmantelamento da sanidade na Mariña e no concello. Tanto o señor alcalde como o concelleiro e deputado do PP, José Manuel Balseiro, xuraban e perxuraban que non se ía perder ningún servizo. É unha auténtica pena ver como pasados varios días, o primeiro concello afectado polas políticas sanitarias da Xunta de Galicia é o seu”.

Insisten en que “ós membros do Partido Popular non lles tembla o pulso para seguir mentíndonos a cara día tras día, facéndonos crer todo o contrario do que teñen previsto, o total desmantelamento da sanidade pública, un servizo tan importante, que tanto nos costou conseguir e que nos queren arrebatar dun plumazo. Señores do PP, non o imos tolerar, porque non somos cidadáns de segunda”.