Villares: “O Concello de Cervo nin apoia, nin respalda, nin avala a decisión do Sergas para os dous centros de saúde do municipio”

Cervo, 7 de xuño de 2013-O alcalde, Alfonso Villares, valorou hoxe o anuncio feito polo Sergas en relación á problemática do centro de saúde de Cervo. O Servizo Galego de Saúde informou de que a partir do día 17 de xuño dito ambulatorio contará cun médico para a prestación de servizos de atención primaria que procederá do consultorio de San Ciprián.

O rexedor asegura que “o Concello nin apoia, nin respalda, nin avala a decisión tomada polo Sergas para os centros de saúde de Cervo e San Ciprián”. Villares explica que a Consellería de Sanidade só lle plantexou ao Concello dúas posibilidades: ou manter os tres médicos de San Ciprián e pechar o consultorio de Cervo, ou recolocar a un dos facultativos de San Ciprián en Cervo. “Dentro desas dúas únicas opcións que contemplou a Consellería, o Concello preferiu aquela que permitía a continuidade de ambos centros” asegura o mandatario cervense.

“De ningunha maneira podiamos apoiar a desaparición do ambulatorio de Cervo” engade o rexedor, “e a reubicación dun facultativo de San Ciprián era a única alternativa que ofrecía Sanidade para non pechar o centro de saúde”. Ademais o primeiro edil quere deixar claro que “dende o Concelllo de Cervo defendemos como algo irrenunciable e indiscutible a prestación de servizos médicos de calidade nos dous consultorios do municipio” e de feito “así o temos esixido diante da Consellería de Sanidade e do Sergas en canto tivemos coñecemento da situación”.

Villares tamén explica que “aínda que esta saída non nos guste, o Sergas transmitiunos que esta reorganización non afectará á calidade da asistencia médica e que está dentro das ratios recomendadas”. Algo que o rexedor matiza: “O goberno de Cervo vixiará e permanecerá expectante para comprobar e esixir que este compromiso de calidade se cumpra”.

O mandatario cervense tamén quere poñer de manifesto a importancia de manter activo o ambulatorio de Cervo “tanto pola necesidade de dar unha cobertura médica o máis próxima posible evitando desprazamentos, pero tamén como un servizo que mantén vivo a un núcleo de poboación”.

Críticas do PSOE
“En momentos coma este, nos que a veciñanza está preocupada” manifesta Villares, “o PSOE non está á altura”. O rexedor lamenta que os socialistas “intenten incendiar á cidadanía e fomentar os localismos asegurando que hai diferenzas entre uns veciños que, en realidade, son dun único concello”. “Os socialistas coas súas declaracións queren enfrontar aos veciños de Cervo e San Ciprián e cuestionar a unidade dun pobo que ninguén máis que os señores do grupo municipal socialista pon en dúbida” engade o rexedor, que ademais lembra que “toda desunión dun pobo é prexudicial e que no Concello de Cervo todos os veciños son iguais e iso é polo que seguiremos velando, pola prestación idéntica dos servizos en todo o territorio municipal”.