Izadas as bandeiras azuis da Marosa e O Portelo

Burela, 11 de xullo de 2013. Este mediodía foron izadas as bandeiras azuis nas praias de A Marosa e O Portelo. Nos actos participou o vicepresidente de ADEAC-España, José Palacios. O alcalde, José Mª González Barcia, lembrou que A Marosa conta con este galardón desde hai 25 anos e O Portelo desde o 2001. González Barcia agracede aos veciños e ás veciñas de Burela o seu compromiso co medio ambiente e co entorno natural, porque sen eles non sería posible conseguir estes recoñecementos.

O rexedor dixo que “a mediodía de hoxe izamos as bandeiras azuis tanto na praia de Portelo como da Marosa acompañados do vicepresidente de Adeac España, José Palacios Aguilar. Para nosoutros son actos significativos”.

González Barcia subliñou que “a praia da Marosa cumpre 25 anos de bandeira azul, que obtivo por primeira vez no 1988. Son 25 anos nos que, de forma ininterrompida, esta praia conta con bandeira azul e, ano tras ano, mellorando a súa dotación e os seus servizos. E a praia de Portelo conseguiu por primeira vez este galardón no ano 2001 e no 2003 perdeuna, pero recuperouna no 2004 e xa a partires de aí de forma ininterrompida conta con esta distinción”.

O alcalde indicou que “agora mesmo as praias de Burela contan xa con socorristas, está practicamente rematada a dotación de infraestruturas e soamente nos queda agradecerlle á cidadanía en xeral a súa colaboración para que as dúas praias conten con bandeira azul. Por moito que o Concello faga e se esforce se non hai a colaboración cidadá para manter as praias en perfectas condicións de limpeza, de respecto ao medio ambiente, etcétera, evidentemente nosoutros pouco ou nada poderíamos facer”.

José Mª González Barcia tamén se quixo referir aos comentarios que se están a producir sobre a vexetación que hai nas praias: “quero aclarar que non se pode retirar. A herba que pode aparecer na area, nas zonas de dunas, etcétera, non se pode sacar, porque está terminantemente prohibido pola Lei de Costas. Exactamente igual que, salvo en casos extremos, tampouco se poden retirar as algas que aparecen nas praias, excepto que provoquen malos olores ou a aparición de insectos. Son cousas que a moitas persoas lles poden sorprender, pero a lei é como é e polo tanto todos temos a obriga de respectala”.