Dous novos mozos titulados benefícianse do Plan de Fomento do Emprego Xuvenil de Cervo

Cervo, 3 de agosto de 2013.- O departamento de Emprego, que dirixe Yolanda Pedreira, informa de que esta semana dous novos mozos cervenses iniciaron as súas prácticas a través do Plan de Fomento do Emprego Xuvenil. Uns titulados que se benefician deste xeito das bolsas formativas remuneradas dirixidas á mocidade de Cervo con estudos universitarios ou de FP.

Con eles son xa seis os mozos e mozas que realizan tarefas en prácticas nas dependencias municipais e en empresas a través deste plan pioneiro de apoio á xuventude formada de Cervo. Foi hai un mes cando os primeiros bolseiros comezaron as súas prácticas, dous deles vinculados ao departamento de Deportes do Concello, outro ao departamento de Medio Ambiente e o cuarto na planta de Alrogal.

Neste caso, trátase dun titulado de FP en sistemas microinformáticos e redes adscrito ao departamento de Informática do Concello e unha titulada de FP en administración e finanzas que desenvolve as súas tarefas en Fidel Electricidad. Así, en total, son catro os bolseiros vinculados a servizos e departamentos municipais e outros dous a empresas privadas.

Cabe destacar que dende a Concellería de Emprego estase velando porque as prácticas dos titulados sexan de utilidade para a súa posterior incorporación ao mercado laboral e lles permitan ter experiencias reais relacionadas coa súa formación.

Ao mesmo tempo, o departamento lembra que a intención do Concello é ofrecer prácticas a todos os mozos e mozas cervenses que cumpran os requisitos esixidos por FEUGA, que é a entidade promotora mentres o Concello funciona como entidade colaboradora financiando as bolsas. En concreto, a administración local asume os pagamentos ao 100% cando se trata de bolseiros que realizan tarefas en dependencias municipais. No caso das prácticas en empresas, o Concello achega o 50% da remuneración e entidade privada o 50% restante. Este ano, a administración cervense ten previsto investir 35.000 euros neste plan, e xa traballa para incluír nos orzamentos do ano que vén unha partida para darlle continuidade.

Dende o Concello lembran os requisitos para optar ás bolsas formativas fixados por FEUGA, como son ser titulado universitario ou de FP do sistema público educativo de Galicia, empadroado en Cervo, menor de 30 anos no caso de titulados de FP e menores de 31 no caso de persoas con estudos universitarios. Ao mesmo tempo, non poderán ter pasado menos de 3 anos dende a obtención do título e non poderán ter desempeñado un traballo profesional remunerado relacionado coa súa titulación.