Medio Ambiente pon en marcha as obras de reforma do firme da estrada LU-540 no treito de entrada ao Concello de Viveiro

Lugo, 5 de agosto de 2013.- A Xunta de Galicia, a través da Consellería de Medio Ambiente, Territorio e Infraestruturas, ven de poñer en marcha as obras de mellora do firme da LU-540, nun tramo de catro quilómetros correspondente á entrada no municipio de Viveiro desta estrada que une o municipio viveirense e Xermade.

A delegada territorial da Xunta, Raquel Arias, significou que “esta actuación servirá para mellorar a plataforma da vía e incrementar a seguridade viaria da estrada”. No proxecto, segundo indicou Arias, o Executivo galego inviste preto de 75.000 euros (74.855,38 euros).

Co proxecto que se leva a cabo estes días “actuarase para manter os niveis de calidade nos distintos elementos funcionais deste tramo da estrada LU-540, que en función do uso presenta nalgunhas zonas un progresivo deterioro”, explicou a delegada. En concreto, os traballos de rehabilitación do firme levaranse a cabo nun tramo de catro quilómetros (do punto quilométrico 4 ao 8, exactamente).

Coa actuación nesta vía de comunicación, beneficiarase directamente ás máis de 16.000 persoas da área de influencia directa deste tramo de vía, así como ao resto de usuarios que empregan habitualmente esta estrada.

Mediante a actuación programada farase unha rehabilitación estrutural de defectos no firme dos carrís de circulación da entrada a Viveiro por esta estrada. Esta rehabilitación consiste, fundamentalmente, rexeneración e aportación dunha nova capa de aglomerado asfáltico a fin de uniformizar as condicións de adherencia neumático-pavimento.

Estes traballos de rehabilitación estrutural veranse complementados pola correspondente execución das actuacións de repintado da sinalización, cos que se prevé que quede rematada ao longo deste mesmo mes.

Outras actuacións
“A mellora das condicións da LU-540 neste treito é unha actuación necesaria que se leva a cabo no marco das actuacións programadas de conservación na comarca da Mariña”, resumiu Raquel Arias, antes de referirse a que “esas actuacións programadas por toda a zona norte lucense, que empezaron a desenvolverse a principios do verán, suporán un investimento de máis de 400.000 euros (408.347,09 euros) e servirán para mellorar as condicións de estradas en catro concellos da zona, cos que se beneficia directamente a 33.000 persoas”.

As obras, coas que se responde ás necesidades das vías polo deterioro do firme que presentan dada a intensidade do tráfico soportado, “permitirán manter deste xeito o patrimonio viario nunhas condicións de utilización satisfactorias”, concluíu Arias.