O Concello de Burela realizou tarefas de mantemento no edificio nº1 do CEIP Vista Alegre

Burela, 26 de agosto de 2013. O alcalde, José Mª González Barcia, e os concelleiros de Obras e Educación, Manuel Fernández Valle e Mónica Pedre, visitaron as instalacións do CEIP Vista Alegre para ver as actuacións de mantemento que o Concello realizou no edificio nº 1.

A edil popular Mónica Pedre explicou que “fixemos tarefas de pintado de parte do edificio nº 1, fundamentalmente teitos que estaban afectados por humidades e tamén portas e vallas de seguridade. Déuselle un lavado de cara a parte do inmoble e o seu aspecto mellorou”.

A concelleira de Educación indicou que “estes traballos realizáronse dentro do apartado de prácticas externas dos alumnos do curso de pintura do centro de formación ocupacional de Burela e os materiais foron abonados polo Concello de Burela, que destinou aos mesmos uns 2.000 euros”. E engadiu que “nos vindeiros días, dentro desas mesmas prácticas, os alumnos do curso de pintura seguirán a realizar labores de acondicionamento noutros ámbitos do termo municipal. Por parte da dirección do centro déronnos as grazas do equipo directivo polos traballos que se realizaron e desde o Concello puxémonos á súa disposición para seguir a colaborar con eles, na medidas das nosas posibilidades, co obxectivo de que o centro estea nas mellores condicións posibles”.

Pola súa banda o rexedor anunciou que “desde a alcaldía faremos algunha xestión coa xefatura territorial de Educación para ver de subsanar algunha deficiencia existente e así poder deixar o centro en mellores condicións que as actuais”.