Máis de 150 Concellos e colectivos reunidos en Riotorto esixen a Feijóo que non aplique o copago de doentes crónicos en Galiza

Riotorto 26 de outubro de 2013.- Unha ateigada Casa da Cultura do Concello de Riotorto acolleu na xornada deste sábado unha representativa Asemblea que aglutinaba a diversos sectores da sociedade galega que concordaban na necesidade de demandar da Xunta de Galiza a negativa a aplicar no noso País o copago para aqueles medicamentos que afectan a doentes crónicos así como a anulación desta resolución por parte do Goberno do Estado. Os presentes na xornada en Riotorto representaban Concellos como Monforte, Ribadeo, Allariz, San Sadurniño e asi ate…, colexios profesionais como o de traballadores sociais ou ats, forzas políticas como o BNG, PSOE…, organizacións sindicais como CCOO, CIG, UXT ou OMEGA, asociacións de doentes como ALCER, COGAMI, APNED, Camiña, ou Síndrome de Down, entidades en defensa da sanidade pública como “Sos sanidade pública”, as Plataformas en defensa da sanidade pública da Mariña, A Coruña ou Monforte ou as federacións da saúde das forzas sindicais e colectivos sociais do máis diverso que cubrían un amplo abano que chega desde os preferentistas, aos emigrantes retornados, veciñais, culturais, deportivas ou feministas e así até sumar máis de 150 colectivos.

Os representantes sociais e institucionais presentes en Riotorto acordaron asinar un manifesto no que se recollen os eixos das reivindicacións deste colectivo e que parte dunha análise da decisión do Goberno do Estado de “ aprobar unha Resolución pola que se obriga aos pacientes crónicos a afrontar o copago das menciñas que lle son dispensadas na farmacia dos centros hospitalarios significa cruzar todas as liñas vermellas da sanidade. É máis non hai dúbida que este novo repago, este novo imposto á enfermidade, supón unha carga moi importante na economía de moita xente desfavorecida, persoas que xa non son quen de chegar a fin de mes e outras que xa nin comezan o mes, medida vai significar o sacrificio e sufrimento para moitas persoas e que só podemos tratar de indigna, inhumana, inxusta, a máis de retratar un goberno que actúa ao servizo do poder económico. Acabaramos un novo roubo que forma parte dunha estratexia deseñada para facer caixa a costa das persoas máis desfavorecidas”. Así as cousas o manifesto na súa parte dispositiva aclara que os colectivos asinantes demandan que “non hai, en definitiva, máis camiño que primeiramente instar ao Presidente da Xunta Galiza a que paralice a entrada en vigor da Resolución do 10 de setembro de 2013, da Dirección Xeral da Carteira Básica de Servizos do Sistema Nacional de Saúde e Farmacia, pola que se procede a modificar as condicións de financiación de medicamentos incluídos na prestación farmacéutica do Sistema Nacional de Saúde mediante a asignación de achega do usuario e na mesma liña demandar do Goberno do Estado a derogación da resolución recollida no BOE do 10 de setembro que establece a obrigatoriedade da achega do usuario para as patoloxías e a carteira de medicamentos fixadas na referida resolución”.

O anfitrión da xuntanza e convócante xuntanza, o Alcalde de Riotorto, Federico Gutiérrez Estoa informou que na “ asemblea acordamos dar arranque a unha batalla social que non ten outro obxectivo que garantir a gratuidade da sanidade e neste sentido á par das alternativas que se leven adiante no campo institucional, a batalla a día de hoxe situase en parar esta contrareforma xogando coa data que o Goberno da Xunta pretende que a decisión entre en vigor en Galiza. Por iso hai que intensificar a loita antes do do 1 de Xaneiro de 2014, e neste sentido acordamos convocar para o venres, día 8 de novembro, concentracións en todas as Comarcas e nos Hospitais de referencia das cidades , para socializar e popularizar esta loita pero sobre todo para que fique patente a opinión da sociedade e a oposición do pobo a esta decisión. Queremos por conseguinte o día 8 de novembro darlle a voz a xente para que lle quede moi claro á Xunta e ao estado que non toleramos que que ningún cidadáns poida morrer por carecer de recursos para tratarse. Asemade na propia reunión acordouse convocar unha mobilización nacional en Compostela para o vindeiro 17 de novembro, unha manifestación que non é punto de chegada de nada, posto que no caso de que este Goberno non mude a súa oposición teremos que optar por outras alternativas para darlle continuidade a loita”.