Iniciativa Galega Pola Gratuidade da Sanidade Pública desconvoca o feche tras recibir o compromiso do gabinete de Feijóo de seren recibidos nos vindeiros días

14 de novembro de 2013. Tras a insistencia de Iniciativa Galega Pola Gratuidade da Sanidade Pública para ser recibidos polo presidente da Xunta de Galiza, Alberto Núñez Feijóo, co fin de urxirlle que paralice a aplicación do copago dos medicamentos de dispensación hospitalaria para pacientes ambulatorios con enfermidades graves e/ou crónicas e debater sobre o futuro da sanidade pública galega, fontes do Gabinete do líder do Executivo galego comprometéronse a que nos vindeiros días os membros da plataforma serían convocados para dito encontro co presidente.

Desde a plataforma esperan que este compromiso se faga efectivo canto antes xa que de non ser así retomarán o feche nas instalacións da Xunta de Galiza en San Caetano, en Santiago de Compostela, até lograr o seu propósito, xa que entenden que “as medidas que en materia sanitaria está aprobando o Goberno do Estado e que o Goberno galego está aplicando obviando os dereitos dos galegos e galegas, teñen como única finalidade excluír do Sistema Sanitario aos enfermos e, principalmente, a aquelas persoas que non teñen recursos económicos para facer fronte a tanto copago. O Partido Popular está a traballar para que só os ricos teñen dereito á saúde.”

Manifestación en Compostela o 17 de novembro
Iniciativa Galega pola Gratuidade da Sanidade Pública, que agrupa a diversos colectivos da comarca de Lugo, participará na manifestación nacional que se celebrará este domingo, 17 de novembro, en Compostela, baixo o lema “O copago mata, por unha sanidade galega gratuíta”, que sairá da Alameda ás 12:00 horas. Insisten en que “é importante a participación de todos os galegos e galegas, en canto está comprobado que o único que paraliza ao Partido Popular é a contentación social. Non estamos dispostos a permanecer quedos mentres o Goberno do Estado e a Xunta de Galiza continúan atacando dereitos fundamentais. A sociedade ten que revelarse contra medidas inxustas e discriminatorias, como é o establecemento do copago para enfermos crónicos e/ou graves, vítimas, tamén, doutros copagos establecidos anteriormente e que veñen minando gravemente as súas posibilidades de disfrutar dunha sanidade pública, gratuíta e de calidade. Digamos non a repago.”

Para todos e todas as lucenses que queiran asistir a esta manifestación, sairán autobuses ás 10:00 horas de diante de Sindicatos na Ronda da Muralla; pódese reservar praza nos autobuses nos teléfonos 982.28.4.10 e 982.55.58.12, até as 20:00 horas do venres 15 de novembro.