Os socialistas dos 67 Concellos pedirán á Xunta a retirada do novo modelo de xestión clínica, pois “veta o acceso dos lucenses á Sanidade pública”

Os secretarios de Organización e de Sanidade da executiva provincial do PSdeG-PSOE, Carlos Ferreiro e Darya Fernández, respectivamente, aseguraron este venres que as medidas privatizadoras impostas pola Xunta de Galicia en materia sanitaria nesta provincia “certifican que o Partido Popular veta o acceso dos lucenses á Sanidade pública”. Neste senso, criticaron e rexeitaron decididamente o modelo de xestión clínica que pretende implantar a administración autonómica no mes de xaneiro, e que implica por unha banda que os tres hospitais da provincia –Lugo, Burela e Monforte- perdan a autonomía dos equipos clínicos e, pola outra, estruturar os procesos asistenciais ó redor das necesidades específicas do doentes, especialmente nos doentes crónicos con máis dunha patoloxía. Por elo, os socialistas anunciaron que presentarán nos 67 Concellos da provincia unha moción conxunta nos seus respectivos Plenos para instar ó Goberno galego a retirar o decreto que regula a posta en marcha deste modelo de xestión sanitaria. “Agardamos contar co apoio do Partido Popular, xa que, do contrario, estará sendo cómplice e co-autor desta medida que supón a privatización definitiva da nosa Sanidade”, aseguraron.

A Consellería plasmou no documento Estratexia SERGAS 2014 a súa folla de ruta, segundo o cal as Unidades de Psiquiatría, Neumoloxía e Cardioloxía do HULA serán xestionadas por mans privada, a partires de xaneiro. O decreto presentado polo Partido Popular nesta materia “é ambigüo e confuso, deixa claro que ditos servizos estarán dotadas de personalidade xurídica propia. É dicir, serán independentes do SERGAS”. Un dos obxectivos é destes é integrar os procesos asistenciais. Se hai uns anos os centros de saúde dunha área sanitaria tiñan un responsable, e o hospital outro, agora a atención primaria e especializada intégranse nunha mesma xestión. Deste xeito, Primaria será a gran ferramenta para desconxestionar a atención especializada. É dicir, os profesionais dos centros de saúde van realizar cada vez máis tarefas que antes requería da atención especializada. Por exemplo, tal e como indicaron os socialistas, as citoloxías rutinarias xa non chegarán á consulta do xinecólogo. Os médicos de cabeceira poderán solicitar máis pobras de diagnose e coa receta electrónica prescríbirán tratamentos para enfermos crónicos durante meses. Incluso poderán consultar por teléfono para axilizar os centros de saúde, tal e como anunciou a Xunta esta mesma semana.

Así mesmo, o Boletín Oficial do Estado (BOE) de 25 de xullo de 2013 publicaba a modificación da lei 55/2003 do Estatuto marco do Persoal dos Servizos de Saúde, no que aparece que os profesionais destas áreas perderán a súa condición como traballadores públicos para ser empregados dunha empresa privada. A súa prioridade non é buscar a eficacia senón cadrar as contas e que os beneficios non sexan para o servizo público”, afirmou a secretaria de Sanidade.

“Só se pode gañar eficiencia nos procesos asistenciais”
Deste xeito, tal e como indicou Darya Fernández “nestes momentos non caben máis recortes lineais na Sanidade pública, polo que só se pode gañar eficiencia nos procesos asistenciais. Non é concebible que nun sistema sanitario solvente os médicos pasen a ter ningunha responsabilidade nas decisións de asignación de recursos. O PP con esta medida está a conseguir: primeiro, desmantelar a Sanidade e, segundo, convertela nun nicho de negocio para empresas amigas, vendéndoa por peza ó mellor postor. Nestes momentos, o SERGAS xa está derivando en Lugo os accidentados leves a centros privados polas ambulancias do 061. Que conseguen con isto? levar ós pacientes menos costosos ós hospitais privados nos que son sometidos a numerosas probas prescindibles que pagan as asegurados, de forma que este diñeiro deixa de ser ingresado polo sistema sanitario público. Isto é o que se chama a porta xiratoria política-empresa, ó propiciar que moitos médicos deriven ós pacientes ós centros amigos”, afirmou.

A Xunta de Galicia pretende así aforrar cartos, pero isto “é pan para hoxe e fame para mañá. Por un lado Feijóo asegura que leva vinte anos dedicándose á Sanidade e que dende entón se comenta que pode haber interese por privatizar o sistema, pero que nada disto vai pasar. Por outro lado, a Conselleira di: Crucemos los dedos para que la aportación sanitaria del usuario no necesite más cambios. Este é a mostra de que as medidas privatizadoras xa están aquí”, asegurou a socialista.

Aumento da listaxe de espera e peor calidade asistencial
Segundo afirmaron os socialistas, este novo modelo de xestión vai provocar un empeoramento na atención, así como un aumento notable da listaxe de espera. “Di a Conselleira nuestro modelo de gestión non es privatizar la bata blanca. E que solución dá? que Lugo comparta o servizo de Hemodinámica con Coruña e Ferrol para dar cobertura ó norte de Galicia… En definitiva, teremos unha peor calidade asistencial e teremos que agardar máis tempo para unha consulta do especialista ou para unha cirurxía”.

En 2009 a media era de 92 días. En setembro de 2013, a última cifra oficial, a demora foi de 99 días. Por tanto, co novo sistema, es número aumentará notablemente. Resulta evidente, por tanto, que os prazos frixados pola lei de garantías aprobada no Parlamento a semana pasada para que os doentes de determinadas patoloxías non esperen 60 días para operarse, resultará imposible cumprilos, sobre todo, porque Feijóo tamén suspendeu o plan de mellora de atención primaria, que recollía un aumento da plantilla dos centros de saúde e puntos de atención continuada. Isto provocou que se reducisen as substitucións. “O persoal de enfermeiría sen praza pasou a ser un colectivo case sen paro ó non ter case chamadas para facer substitucións”, conclúen.

Galicia debe ter unha taxa de reposición á hora de convocar ofertas de emprego do 10%. Nestes momentos están pendentes oposicións con 176 prazas de médicos e outra 165 para persoal médico e de enfermeiría. Con esta taxa perdéronse 3.000 postos de traballo.

O PP “está ferindo de norte á Sanidade pública”
No ano 2009, o SERGAS destinou a receitas máis de 924 millóns de euros, sen contar o gasto farmacéutico hospitalario. En 2012, segundo ós últimos datos que o Servizo Galego de Saúde fixo públicos, o gasto destinado a medicamentos que se recolle nas oficinas de farmacia caeu a 710 millóns, é dicir, case 200 millóns; un 50%.

Os grandes perxudicados foron, sen dúbida, os pensionistas. Dende o 1 de xullo de 2012 as 119.876 persoas que superan os 65 anos da provincia están a padecer os efectos do “medicamentazo”, que supón que cada mes teñan que desenvolsar un 1 millón de euros.

A esta drástica medida súmase o copago. Segundo estima Sanidade este afectará a un milleiro de doentes, que pagarán o 10% do prezo do fármaco, ata un máximo de 4,2 euros por envase. O aforro anual estimado: tan só será de 250.000 euros. Cada semana, os galegos veranse obrigados a facer unha aportación de entre 1,5 e 2 millóns de euros debido ó copago farmacéutico, que afecta a 42 fármacos. Só na provincia de Lugo existen nestes momentos uns 600 pacientes oncolóxicos que están a ser tratados no HULA -o 60% de todos os doentes que padecen unha enfermidade deste tipo en Galicia. Precisan entre 2 e 4 fármacos ó día, cun custe duns 4 euros por fármaco; o que supón pagar uns 190 euros. E, se o tratamento dura alomenos un ano, terán que pagar do seu peto, por primeira vez, 115.200 euros.

Máis medidas irracionais e discriminatorias
Esta é unha medida irracional e discriminatoria, que só serve para agravar as enfermidades e para causar problemas que poden ser irreversibles. Deste xeito, denuncian o recente anuncio do Servizo Galego de Saúde de pechar 20 camas no HULA no Nadal. “É vergoñenta a explicación que dá Xunta de Galicia de agrupar ós doentes para que estén máis preto. O único que queren é evitar as contratacións, o que provocará un incremento na listas de espera. Isto foi o que fixo tamén no verán, época na que o SERGAS tamén pechou 125 camas”.

Así mesmo, Darya Fernández tamén indicou que outros exemplos do desmantelamento que está a levar a cabo a Xunta de Galicia da Sanidade luguesa é que esta administración segue sen buscarlle unha utilidade á antiga residencia; a ampliación do hospital da Costa é o “conto da boa pipa”, pois continúa sendo unha irrealidade, pese a ser anunciado en 5 ocasións polo goberno de Feijóo. A este respecto, os socialistas anunciaron que o Partido Socialista presentou unha emenda específica ós Orzamentos da Xunta para que o Goberno galego incluíse unha partida de 2 millóns de euros para este fin. “A semana que vén saberemos cal é a postura do PP no Parlamento, se vota a favor ou, pola contra, veta directamente este proxecto”, concluíron.

Desaparece o servizo do 065
Os socialistas tamén criticaron que a Xunta suprimise a gratuidade do servizo de transporte 065, pois o único que provocará é que sexan as organizacións da discapacidade as que teñan que prestar o seu servizo e polo tanto estarán obrigadas a suplir o que é obriga do Goberno galego. O Executivo de Feijóo ten establecido un prezo de 9 euros a financiar entre a Xunta e o usuario, impoñendo un copago mínimo de 32 euros por usuario e mes. No caso, de que unha persoa perciba o IPREM este prezo aumentará ós 45 euros mensuais. E se o usuario é mileurista, a cantidade que deberá de abonar será de 130 euros.

Con esta drástica medida, a administración autonómica deixará, por exemplo, sen cobertura a 13 do 45 usuarios que acuden a diario á aula ocupacional de COGAMI en Lugo, e que viven en Portomarín, Outeiro de Rei, Láncara, Sarria, Begonte, As Nogais ou en parroquias rurais de Lugo. Na Mariña hai 168 usuarios deste servizo. A empresa Aspanane subcontratará os traslados a Celeiro cunha empresa privada. Isto provocará que resulte inevitable que asuman os desprazamentos con vehículos propios pola dispersión do rural e a esixencia de levar un conductor e coidador.

“Algo tan sinxelo como ir da súa casa á parada do autobús, subir a él e baixarse para chegar a un centro de día é algo impensable para as persoas por exemplo con dano cerebral. Por tanto, se teñen que costearse o transporte veranse na obriga de ter que abandonar a terapia. Pero non só é a distancia. Nin sequera no caso de que as súas familias poideran costearse transportes continuos en taxi estaría resolto o problema porque moitos dependentes precisan vehículos adaptados”, afirmaron.