A EMMeD de Ribadeo celebra este sábado o seu festival de Nadal

Ribadeo, decembro de 2013. A Escola Municipal de Música e Danza (EMMeD) de Ribadeo celebra este sábado, 21 de decembro, ás 18.00 horas, no auditorio municipal Hernán Naval o seu tradicional festival de Nadal. Por riba do escenario pasarán un total de 14 formacións integradas por arredor de trescentos alumnos e alumnas do centro.

No repertorio deste ano non faltan as panxoliñas, pero tamén hai cabida para outros ritmos como fragmentos de ópera, música moderna, blues ou sons caribeños. “O de Nadal é, xunto con fin de curso, o festival que máis éxito ten tanto entre o alumnado coma entre o público, de aí que cada ano procuremos ofrecer cousas novas tanto a nivel de repertorio coma de posta en escena”, apunta Hugo García, director da EMMeD de Ribadeo.

Pero, sen dúbida, o aspecto máis destacado do festival de Nadal deste ano, tal e como acontecera en 2012, é a súa vertente solidaria. Ao longo de toda a semana e o propio sábado á entrada do concerto, a EMMeD de Ribadeo realizará unha recollida de produtos de Nadal (turróns, polvoróns, mazapáns…) para entregar ao departamento de Servizos Sociais do Concello co fin de que sexan distribuídos entre familias con escasos recursos da vila e das parroquias. Hugo García convida “a toda a comunidade educativa a que, na medida das súas posibilidades, faga unha pequena achega a esta recollida de alimentos pois cun pouco de cada un de nós podemos axudar a moitas persoas”.

O director da EMMeD de Ribadeo sinalou que “unha das apostas da EMMeD de Ribadeo é achegar durante todo o curso ao alumnado valores que vaian máis aló do estritamente musical de aí a inclusión no currículum académico do centro de aspectos como a solidaridade, a igualdade entre mulleres e homes ou a loita contra a discriminación de todo tipo”.

A EMMeD de Ribadeo pon fin deste xeito ao primeiro trimestre dun curso especial no que celebra o seu vinte aniversario e retomará as clases o 9 de xaneiro.