A Plataforma na defensa da Sanidade Pública da Mariña apoia a mobilización convocada para o xoves 27 pola Alianza Social Galega

A Mariña, 22 de febreiro de 2014. A Plataforma na Defensa da Sanidade Pública da Mariña apoiará a mobilización convocada pola Alianza Social Galega para o día 27 de febreiro con inicio na Praza do Concello de Burela. Esta marcha, simultánea a outras convocadas para o mesmo día en Galiza e apoiada pola Asociación Galega para a Defensa Da Sanidade Pública da que a plataforma mariñá fai parte, demanda “Outra Saída á Crise” tal como reza o manifesto acordado entre os colectivos que a apoian.

As organización e colectivos asinantes do manifesto entendemos que os gobernos de Mariano Rajoy e Feijoo, coa escusa da crise, pretenden impoñer constantes recortes nas pensións, no ensino, na sanidade, no impulso ao desenvolvemento económico, desenténdense ou son cómplices na destrución dos sectores produtivos galegos ou na destrución do sistema financeiro galego e impulsan reformas normativas que nos fan retroceder décadas nas liberdades públicas e dereitos sociais, criminalizando a resposta social fronte a unha crise da que a maioría social non é responsábel pero sufre con extrema dureza as súas consecuencias.

En Galiza as taxas de desemprego superan as 270.000 persoas, delas o 45% carecen de cobertura de ningún tipo, o desemprego xuvenil chega ao 50% e preto de 100.000 mozas e mozos de 15 a 35 emigraron fora do país dende 2010. A esta situación engádese a destrución dos sectores produtivos básicos galegos agrario, pesqueiro ou naval froito de políticas europeas que os gobernos galego e estatal son incapaces de corrixir.

Coa escusa da crise, os goberno do PP en Compostela e Madrid impoñen retrocesos no ensino público galego, modificacións na lexislación estatal como a LOMCE que ademais de ser regresiva invade competencias propias, paralización da Lei de Dependencia, contrarreforma da lei do aborto, ataques ao colectivo de traballadores autónomos con subas das cotizacións sociais a un colectivo que en Galiza representa o 21,30% da poboación activa, ou a política de desafiuzamentos que en Galiza afectou a mais de 9.000 persoas dende o inicio da crise condenándoas en moitos casos á exclusión social.

A Plataforma chamou a atención sobre as políticas sanitarias públicas, con gravísimos recortes no financiamento, aplicacións de repagamentos a medicamentos subministrados dentro e fora dos centros hospitalarios, reducións do persoal sanitario e privatizacións masivas que buscan, no conxunto das medidas, ir degradando o sistema público para convertelo nun negocio ao servizo das grandes corporacións financeiras, empresas especializadas e grupos de aseguradoras.