Nardo Martínez: veciño exemplar

A persoa que teña no seu haber que máis de 300 veciños de moi distinta idade, condición, pensamento e intereses decidan, a iniciativa propia, sentarse tras a mesa e o mantel, e participar nunha sentida homenaxe, demostra por méritos propios o moi acertado que sería definilo, en maiúsculas, como veciño exemplar.

En San Ciprián esta persoa ten nome propio: o de Nardo Martínez, que este domingo recibirá o recoñecemento dun pobo agradecido que nin esquece, nin ten previsto deixar no olvido a un dos seus veciños máis ilustres. Este abrazo colectivo non é froito da casualidade, senón dun pobo con ganas de agasallar en vida, enchendo a Praza dos Campos, a este persoeiro tan excepcional.

O que converte a Nardo Martínez en veciño exemplar non é só a súa espectacular calidade humana, a súa disposición de estar sempre ao carón do que pode necesitar a súa axuda, que tamén, senón o feito de que non poderíamos entender a vida social, deportiva e cultural de San Ciprián, nas últimas décadas, sen facer referencia ao seu nome.

Nardo Martínez e una boa persoa, un bo amigo, pero sobre todo, un personaxe cheo de humidade e dunha excelente capacidade de colaboración en todo o que se lle propoña desde as principais asociacións e colectivos do noso concello, entre elas, desde a promotora Mulleres de San Ciprián e a decena de colectivos que se teñen sumado a este recoñecemento.

Este veciño exemplar, ribadense de orixe pero un máis da Península da Paz, ten conquistado coa súa humildade e intenso traballo a centos dos seus veciños. Nardo Martínez non só é un empresario de éxito que con moito suor e esforzo ten contribuído a xerar postos de traballo e riqueza neste pobo, senón tamén o colaborador fiel dos carnavais, o chofer oficial de Papá Noel ou o impulsor e patrocinador de centos de actividades culturais, deportivas e artísticas.

Este recoñecemento, que nace da propia acción social do pobo debe por xustiza ter continuidade con outros moitos que poñan de relevo o respecto e admiración que temos todos os que con honra atopámonos ao seu redor. Quen aquí escribe, o primeiro: orgulloso admirador deste veciño exemplar.

Jose Manuel Balseiro Orol
Secretario do Parlamento de Galicia