O BNG de Barreiros volverá a solicitar en Pleno que o Concello solucione os verquidos na praia de Reinante

Barreiros, 4 de maio de 2014. O BNG de Barreiros volverá a levar ao pleno municipal os verquidos que se producen na praia de Arealonga, procedentes do regato que desemboca no areal. “Nestes días o aspecto que presenta o regato e a súa desembocadura na praia de Reinante é de total insalubridade e demostra que, ao contrario das excusas do Alcalde, o problema non é de incapacidade puntual da depuradora por un incremento de habitantes nos meses do verán, senón que a depuradora de Reinante non está cumprindo coa súa función”, explican desde o BNG.

“O problema ante o que estamos é o total desinterese do goberno municipal por buscar unha solución, xa que ante as denuncias do BNG, primeiro intentan desacreditalas e despois, minten deliberadamente sobre a causa dos verquidos”, sinala a portavoz municipal Ana Ermida. “Tras as reiteradas denuncias dos últimos anos, temos preguntado en pleno por esta cuestión obtendo evasivas como resposta e sen que se tente unha solución.”

Desde a formación frontista recordan que “este é un problema de salubridade, en primeiro lugar, xa que o areal ademais de soportar continuos cheiros que, en boa lóxica, se notan máis no verán; pode verse infectada por bacterias fecais. Pero ademais, non podemos obviar que este areal está comprendido no LIC Rede Natura 2000 de As Catedrais, polo que se podería estar ante un delito ecolóxico.”

Os nacionalistas lamentan que “a única promoción do litoral que fai o Partido Popular sexa investir en cemento, mentras as parroquias viven estes problemas sen que se invista un só euro para solucionalos.” Desde o BNG insisten en que a política de promoción turística de Barreiros aposta por un modelo esgotado e que non se adapta nen á realidade nen á necesidade do concello, polo que instan ao goberno municipal a modificar as súas actuacións e preocuparse polas necesidades das veciñas e dos veciños. “Cos cartos que o Partido Popular gasta en arranxar paseos marítimos, debería atender en primeiro lugar ás necesidades das parroquias. Porque podemos ter paseos marítimos moi arranxados, pero con praias cheas de augas sen depurar, non existe promoción turística que serva de nada”, conclúen os nacionalistas.