O chicharrón

Os anos 40 de tódalas fames, foron significativos para o mundo mariñeiro. A chegada masiva do chicharrón díu un novo pulo á actividade pesqueira da época A cantidade foi tal que chegou a utilizarse como abono nas terras, o que fala da baixa cotización; pero aínda así significou fartura para os estómagos escuálidos e ilusoria esperanza para os petos esfondados…
Tal sensación de abundancia fixo que no ano 1946 os conserveiros organizasen en La Sociedad, de Papaíto, o baile “da escama” que tivo a réplica no “do oio” no salón de Ramón María de Cao, promovido polos mariñeiros. Éste, no que actuara a Orquestra Sycora Boys, de Grado,tivo o gran éxito, recordado por moitos anos. A costeira foi, pois, de grande importancia para a economía esperanzada das nosas xentes, por iso todos a seguían con interese, dende que as lanchas saían do peirao ata o regreso; e pola noite, a través dos chuzos (candís alimentados con carburo ou saín de peixe) seguían dende terra a evolución das mesmas, para o que se situaban en altiños dende os que se observaban os movementos nas embarcacacións no mar: cando se encendían os chuzos, sabíase que pescaban pois alumeaba a faena de largar o aparello e metelo a bordo. As lanchas faenaban a media hora da costa.A abundancia era tal que algunhas embarcacións adicábanse ó “carrexo”; é decir, ó traslado ó peirao do capturado por outras unidades, repartíndose a metade para cada unha das embarcacións que participaran na captura e o carrexo.A veces a carga era tal que as lanchas navegaban medio afundidas e, nunha ocasión unha delas, a Jesús del Gran Poder, xa amarrada no peirao, a piques estivo de afundirse na dársena.

O impacto de tanto peixe en terra mesmo chegou a definir a temporalidade na linguaxe popular, pois aínda hoxe se escoita decir a xentes da nosa quinta: “ lembro que nos anos do chicharrón…”.

Este fin de semana a hostalería de Foz rende homenaxe a un producto histórico, de alto valor nutritivo e sabor singular, que nos remite a unha sociedade moi afastada da de hoxe, que ten o referente mais popular no chicharrón…

Suso Fernández