Manifesto contra a LOMCE lido nos centros de ensino da Mariña

No mes de novembro de 2013, entrou en vigor a LOMCE. A Plataforma Galega en Defensa do Ensino Público, integrada por alumnado, profesorado e pais e nais, a través de diferentes entidades que os representan, levou adiante numerosas mobilizacións que amosaron un clamor maioritario en contra da aplicación desta lei, profundamente lesiva para o ensino público galego.

O vindeiro curso 2014-2015 comezará, segundo a previsión tanto do goberno central como do galego, a súa implantación. Malia ter sido aprobada, a Plataforma Galega non vai abandonar a loita contra a LOMCE e vai exixirlle, de novo, á Consellaría de Educación que non aplique esta lei porque impide un ensino en galego, equitativo e inclusivo. Unha lei que afonda no centralismo e na desgaleguización, invadindo competencias. Unha lei que procura un ensino profundamente selectivo e clasista, mediante a segregación, as reválidas e os itinerarios educativos. Unha lei que deseña un sistema educativo ao servizo da patronal do ensino privado concertado e da Conferencia Episcopal e desbota a xestión democrática dos centros.

Neste momento, xa podemos constatar que se dificulta e impide a participación e a opinión do profesorado na elaboración dos currículos escolares, con prazos insuficientes e a improvisación e a imposición como pautas de actuación. Son evidencias tanxíbeis dunha actitude antidialogante e impositiva, a mesma que o PP utilizou na tramitación e na aprobación da LOMCE que, facendo uso da súa maioría absoluta, aprobou cos seus únicos votos.

E como fiel seguidora do Goberno central, a Consellaría de Educación iniciou a aplicación da LOMCE coa publicación da orde de nomeamento das direccións para os centros escolares, acelerando a aplicación dun dos aspectos máis antidemocráticos da lei: a liquidación da participación efectiva do claustro e do Consello escolar na elección da dirección do centro.

Neste contexto, a Plataforma Galega fai un chamamento as ANPA, profesorado e alumnado para que combatan activamente a LOMCE, negándose á aplicación dos aspectos máis lesivos. Por iso propoñemos:
 Non fixar novos libros de texto para o alumnado, intentar traballar con outro tipo de materiais e manter actividades complementarias que reforcen a galeguización do ensino.
 Procurar que as familias opten pola elección da materia Valores Socias e Cívicos, en primaria, e por Valores Éticos, en secundaria, no canto da materia de Relixión, e usar mecanismos como, por exemplo, equiparar as cualificacións destas materias á de Relixión para favorecer que o alumnado opte pola materia alternativa á Relixión.
 Intentar que a aplicación da LOMCE non supoña perda de carga lectiva para materias como Educación Artística, en primaria, Educación Artística e Visual, Música, Francés, Tecnoloxía ou Filosofía, necesarias para a formación integral do alumnado.
 Que non se inclúa a materia Iniciación á Actividade Emprendedora e Empresarial como oferta do centro, por non ser necesaria para a formación integral do alumnado e porque reforza a ideoloxía neoliberal no ensino.

 Manter en primaria o esquema estrutural por ciclos, tal e como se fixo até agora.
 Procurar que a persoa proposta para a dirección sexa a que teña o apoio maioritario do Consello Escolar e do Claustro de profesorado e que as persoas elixidas para formar parte da comisión de elección de director/directora defendan a opinión maioritaria do Consello Escolar. A dirección debe comprometerse a que o Consello Escolar e o Claustro manteñan as competencias que até agora lles correspondían.
 Non acollerse aos programas de calidade, xa que procuran un modelo de xestión mercantil e empresarial, así como a especialización curricular e a estratificación dos centros con base nos resultados académicos, porque comportarán máis recursos para os centros con mellores resultados académicos e porque a dirección dos centros que se acollan aos programas terán a potestade de rexeitar a incorporación de profesorado interino e de manter o profesorado no centro, á marxe dos concursos de traslados.
 Rexeitar que para a admisión do alumnado se reserve o 20% da puntuación a criterios de rendemento escolar .
 Rexeitar participar nas avaliacións das reválidas e na cualificación do alumnado doutros centros e negarnos a publicar o resultado das avaliacións finais de primaria e das de diagnose que se poidan estabelecer.

Esixímoslle tamén á Consellaría de Educación que non se modifiquen os libros de texto e que se recupere a súa gratuidade, evitándolles ás familias un gasto moitas veces inasumíbel. Reclamamos a gratuidade dos libros de texto e do material escolar para todo o alumnado de educación infantil, primaria e ESO.

Opómonos a que, mentres se suprimen unidades no ensino público, se continúe subvencionado o ensino privado concertado con preto de 250 millóns de euros do erario público, cada ano, mesmamente en niveis non obrigatorios e en centros que segregan alumnado por razón de sexo.

Reclamamos que non se siga recortando no ensino, que non se reduza o número de postos escolares nin de unidades, que non se diminúan os recursos económicos dos centros, nin que se reduza profesorado.

Igualmente reclamamos a gratuidade do comedor escolar, a redución das ratios, prazas suficientes no ensino público en todos os niveis educativos, nomeadamente en formación profesional e en primeiro ciclo de educación infantil; incremento de bolsas e profesorado suficiente nos centros públicos.

Por todo isto, a Plataforma Galega en Defensa do Ensino Público reclama que a Consellaría de Educación non aplique a LOMCE e non continúe atacando e recortando o ensino público en Galiza, e declara que seguirá loitando para procurar a derrogación desta lei tan lesiva para a educación pública galega.