Cervo presenta a I Regata de Bateis na que participarán 6 tripulacións de clubs de San Cibrao, Celeiro e Castropol

Cervo, 14 de xullo de 2014- O Club Náutico Amigos do Mar e o Concello de Cervo deron este luns a coñecer os detalles da I Regata de Bateis de San Cibrao que se celebrará o mércores 16 de xullo (17:30 h.), que se inclúe ademais no programa das festas patronais do Carme. Unha competición que terá lugar na zona do peirao e na que participarán a sección de Remo do Club Náutico Amigos do Mar de San Ciprián, o Club de Remo de Celeiro e o Club de Remo Castropol. Cada club levará dúas tripulacións polo que serán 6 as que compitan.

En concreto, a regata sairá da praia do Torno e incluirá dúas ceavogas, polo que finalmente os competidores completarán catro traxectos de 500 metros entre a praia do Torno e a boia situada no dique Anxuela.

O alcalde, Alfonso Villares, o edil de Deportes, Luis Guillén, o presidente do Club Náutico, Marcelino Bermúdez e Moisés Teixeira, responsable da sección de Remo, presentaron o cartel xunto aos trofeos que se entregarán o día da regata. Unha competición que organiza o club e coa que colabora o Concello de Cervo co obxectivo de fomentar este deporte que Amigos do Mar está traballando para impulsar.

Guillén asegura que o Concello comparte ese obxectivo de promover o remo entre a poboación. Neste sentido lembra que hai uns meses a administración local achegara 6.000 euros para a compra dun batel de competición que foi cedido ao club e no que a Xunta tamén colaborou destinando 6.200 euros. O edil asegura que organizar unha regata de bateis é unha “forma excepcional de darlle visibilidade a este deporte”.