LUGO .- A Xunta de Goberno da Deputación aprobou, entre outros asuntos relativos á provincia, o informe realizado polo servizo de Vías e Obras sobre o estudo informativo da autovía San Cibrao-Barreiros, apoiando a proposta dos concellos. Tamén deu o visto e prace a contas xustificativas de gastos para varios concellos, entre eles os de Foz e Viveiro.
NOTA DE PRENSA.
A Deputación aproba 7 obras en vías provinciais por valor de 5,4 millóns de euros
– A instititución provincial acondicionará 57,6 quilómetros de estradas nos Concellos de Monforte de Lemos, A Pontenova, Becerreá, Baralla, Sarria, Lugo e Castro de Rei
– Gato Soengas subliñou que “estes investimentos son aportados ó 100% pola Deputación, o que representa un esforzo por mellorar toda a rede viaria. Na época do PP facíanse pequenos arranxos, pero non eran actuacións integrais nas vías provinciais como o que se pretende agora”
– A Xunta de Goberno aproba por unanimidade o acordo do equipo de goberno na que se solicita á USC o mantemento da titulación de Enxeñería Técnica Industrial
A Xunta de Goberno da Deputación aprobou este venres a contratación de 3 obras en estradas provinciais e a adxudicación provisional doutras 4 nas que o organismo provincial levará a cabo obras de mellora e de acondicionamento, e que suman 5.364.681 millóns de euros. O voceiro provincial socialista subliñou que “estes investimentos son aportados ó 100% con fondos propios da Deputación, o que representa un claro exemplo do grande esforzo inversor que estamos a facer para mellorar a rede viaria provincial”.
En total, acometeranse estes traballos en 57,6 quilómetros que pertencen a vías provinciais dos Concellos de Monforte de Lemos, A Pontenova, Becerreá, Baralla, Sarria, Lugo e Castro de Rei. As obras que se contrataron incluén o acondicionamento da CP 3208 de Seoane, por Cinsa, a Pol, desde o punto quilométrico 0,000 ó 4,320, no Concello de Monforte de Lemos (680.000 euros); da CP 4308 de Pontenova a Aguaxosa, desde o punto quilométrico 0,000 ó 11,000 (1 millón de euros); da CP 0701 de Cereixal ó Cádavo, desde o punto quilométrico 0,000 ó 8,470; e da CP 0501 desde a LU-710 polo Casino á de Cereixal e ó Cádavo, nos puntos quilométricos 0,000 ó 1,010. Estas últimas dúas obras afectan ós Concellos de Becerreá e Baralla e foron contratadas por valor de 770.000 euros.
Antonio Gato explicou tamén que se adxudicaron provisionalmente outras catro nas que se procederá á mellora e renovación do afirmado: no Concello de Sarria, e por un importe de 759.330 euros, a CP 5706, desde a LU-636 por Seteventos a Monseiro (punto quilométrico 0,000 ó 5,015) e da CP 5707 de Aguiada a Louseiro (punto quilométrico 0,000 ó 1,750); no Concello de Becerreá, e cun custe de 713.570 euros, a CP 0708 de Cereixal a Louxas, desde o punto quilométrico 0,000 ó 10,000; no Concello de Lugo, e por valor de 551.541 euros, a CP 2906 de Arrierías por Cuiña a Vilalbite, desde o punto quilométrico 0,000 ó 5,850; e no Concello de Castro de Rei, e por un importe 890.000 euros, a CP 1102 de Coto A, por Ansemar, a Castro Riberas de Lea e acceso a Castro de Viladonga, desde o punto quilométrico 0,000 ó 10,24. A primeira e a última adxudicáronse a Asogal, a segunda a Taboada e Ramos e, a terceira, a Construcións Rafer.
Neste senso, o voceiro provincial socialista subliñou que “faleilles de tramos para resaltar que no goberno do PP facíanse arranxos de 200 e 300 metros, pero non eran actuacións integrais nas vías provinciais como o que se pretende agora. Eu xa non sei se esta semana nos atoparemos coa particular letanía de Barreiro e de Barcia, o que demostra unha total falta de rigor no seu exercicio de oposición”. Gato Soengas engadiu, ademais, que “chegan a dicir que a Deputación se converteu nunha mala axencia de viaxes. O certo é que desde hai algún tempo estamos ensinando o Pazo Provincial e a provincia a todos os lugueses e luguesas a través de Km0 e de distintos actos culturais. É verdade que os veciños están a coñecer á provincia, por iso nisto nos parecemos a unha axencia de viaxes. Precisamente, isto é o que lle produce unha ansiedade diaria ós do PP, xa que agora non se fan viaxes a Namibia, Tanzania e Johannesburgo a conta dos recursos da Fundación TOR. Agora poñemos os recursos a disposición dos cidadáns, aínda que tamén adicamos algún tempo a amañar os grandes fiascos que nos deixou o anterior goberno”.
Mantemento da titulación da Enxeñería Técnica Industrial
Tralo debate xerado sobre a continuidade da titulación de Enxeñería Técnica Industrial no Campus de Lugo, a Xunta de Goberno aprobou, por unanimidade e fóra da Orde do Día, o acordo no que se solicita á Universidade de Santiago de Compostela a que garanta o mantemento da titulación da Enxeñería Técnica Industrial (especialidade de Química Industrial) no Campus de Lugo.
Asimesmo, tamén se deu o visto e prace a 15 contas xustificativas, das que 3 pertencen ó Plan de Comunidades Veciñais de 2007 e o resto ó de 2008. Suman un total de 165.404 euros, dos que a Deputación achega 105.052. Pertencen ós Concellos de Guntín, (3), O Corgo, Chantada, Foz, Friol, Guitiriz, Láncara, Lugo, Outeiro de Rei, Pantón, Pedrafita do Cebreiro, Taboada e Viveiro.
A Xunta de Goberno tamén aprobou o informe realizado polo servizo de Vías e Obras da Deputación sobre o estudo informativo da autovía San Cibrao-Barreiros. Deste xeito, o organismo provincial apoia a proposta manifestada polo Concello mariñano.
A xornada comezará ás 12:00 h cun faladoiro titulado “Vizoso e nós”, no que participarán Pepe Penabade, Pepe Blanco, Caxigueiro, Aurelia Balseiro e Mª Cristina Rubal González, moderados por Antonio Reigosa. Ás 13:20 h abrirase a exposición “Xosé Vizoso. O neno que debuxou un cabalo”, que permanecerá dispoñible durante as festas de San Lucas. A partir das 13:45 h terá lugar o acto de inauguración e descuberta da placa da nova rúa Xosé Vizoso, na Praza da Fonte Vella, coa presenza de autoridades, familiares e amizades do artista. As persoas asistentes recibirán no auditorio unha lámina cunha obra de Vizoso como agasallo.
O sindicato denuncia a decisión unilateral da empresa de retirar días de descanso e implantar quendas que dificultan a conciliación. As concentracións serán nos centros de traballo de Foz (Uxío Novoneira s/n) e Ribadeo (Avda. Galicia 27). Lémbrase que non é unha folga e apélase á solidariedade da plantilla para defender as condicións laborais conquistadas.
O evento ofrecerá mel, produtos de tempada, artesanía, gastronomía e outras propostas locais. O Concello do Valadouro mantén aberto o prazo de inscrición para persoas e empresas expositoras, que poden presentar a súa solicitude na sede electrónica ou nas oficinas do Centro Socio-cultural, Xuvenil e da Terceira Idade “Manuel Lourenzo” ata o martes 6 de outubro, ou ata completar os postos dispoñibles.
Ás 15:15 horas deste martes, un particular solicitou asistencia sanitaria tras a caída dun raio no lugar de Castro de Igrexa (Cazás, Xermade). Varias persoas sentiron os efectos da descarga eléctrica e unha delas quedou atolada. Tras dar aviso ao Servizo de Urxencias Sanitarias de Galicia-061, Garda Civil e Protección Civil, a persoa afectada foi evacuada consciente ao Hospital Universitario Lucus Augusti.
A exposición, instalada no Centro Comarcal Pazo de San Tomé, invita a observar con calma, descubrir historias e poñer en valor un patrimonio vivo que forma parte da nosa identidade. Unha maneira diferente de achegarnos ao mundo rural que tanto significa para As San Lucas.
A viaxe, enmarcada no proxecto «Relevo Xeracional: O Futuro do Mar» e organizada en colaboración co GALP Itsas Garapen Elkartea, permitiu achegarse a iniciativas como Kofradia Basque Seafood, a Escola de Pesca de Ondarroa, AZTI, Albaola ou o Itsas Museo de Donosti, así como a proxectos vinculados directamente á actividade pesqueira e á divulgación, incluíndo o uso de realidade virtual. O intercambio con Euskadi permitiu coñecer modelos que combinan formación, investigación, transmisión do coñecemento e modernización do sector, contribuíndo a identificar novas vías para facilitar a incorporación da mocidade á actividade pesqueira e garantir a continuidade das comunidades costeiras galegas.
Os servizos sanitarios trasladaron ao hospital a tres persoas implicadas nunha colisión frontal en Castro de Rei. Unha delas tivo que ser excarcerada polos Bombeiros de Vilalba. Contra as 11:15 horas deste martes, un particular informou ao 112 Galicia dun choque entre dous vehículos no quilómetro 71 da N-640, á altura da parroquia de Viladonga. Desde o punto, os alertadores sinalaron que unha persoa permanecía atrapada. Desde o Centro Integrado de Atención ás Emerxencias activouse un operativo no que participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada. Os bombeiros liberaron á persoa, que foi trasladada xunto con outros dous feridos ao hospital en ambulancia.
