Só podo dicir: Grazas

Eran os anos 80. Un grupo de veciños, unha lenda mariñeira e moitas ganas de manter viva a historia dunha serea deron lugar a unha festa tradicional, que saíu do pobo e que levaba o nome de Maruxaina. Ao principio eran os propios veciños os que gozaban dela, con tanta forza e tanta implicación que a fixeron cada vez máis grande. Pero os cantos da Maruxaina cruzaron fronteiras e cada vez máis xente quixo coñecer esta historia local. Os veciños, co seu traballo e a súa ilusión conseguiron a declaración de festa de Interese Turístico Galego e contribuíron a que o nome de San Ciprián fose ligado ao da nosa ninfa dos Farrillós.

Un ano máis puidemos celebrar a Maruxaina, e descubrir cal é a fonte do seu éxito: Uns organizadores que traballan de forma incansable, antes, durante e despois da festa. Veciños que senten a Maruxaina, que se desvelan pensando en cada detalle, e aos que só lles preocupa que a xente o pase ben. É un traballo altruísta, ao que dedican máis tempo do que dispoñen, no que deixan o corpo e a alma. E así o sentimos os veciños.

Por iso, só podo dicir grazas. Grazas a todas e cada unha das persoas que formades parte da Asociación Amigos da Maruxaina pola vosa dedicación. E grazas tamén por manter sempre a esencia da festa, por dar a coñecer a lenda da nosa serea, por darlle vida e por facela real cada segundo sábado de agosto. O voso traballo é impagable, ao igual que a diversión que creades en todas as persoas que participan nesta festa.

Por suposto, o meu agradecemento a todos os empregados municipais, que foron moitos e de diferentes servizos, que estiveron traballando ou en vilo para que San Ciprián fose lugar de festa pero tamén de normalidade. Uns empregados públicos que estiveron involucrados dende os días previos ata as xornadas posteriores e que traballaron de forma eficaz e con resultados visibles.

Polo tanto, grazas a todos por facer posible, co voso esforzo, que San Ciprián vibre un ano máis coa Maruxaina.

Alfonso Villares, alcalde de Cervo.