O alumnado de 1º de Bacharelato do IES Ribadeo Dionisio Gamallo comezou o curso cunha viaxe a Alemaña na primeira parte dunha actividade de intercambio que veñen realizando dende fai varios anos.
A través deste proxecto o alumnado toma contacto coa realidade social e académica europea durante 10 días, e cara o final de curso o alumando alemán devolve a visita ás familias ribadenses. Un intercambio que para os alemáns ten prioridade lingüística, xa que os estudo da lingua castelá é obrigatorio durante varios cursos (e de feito comeza a ser a segunda lingua estranxeira máis solicitada por diante do francés), e que para o noso alumnado é fundamentalmente cultural e académico, e sírvelles para coñecer de primeira man o currículo equivalente de estudos e as particularidades do ensino nun país punteiro en moitos aspectos, e referente fundamental do noso futuro común.
Durante a nosa estadía no Karl von Frisch Gymnasium de Dusslingen, ó sur de Stuttgart, pequena poboación cercana á cidade universitaria de Tübingen o alumnado comparte clases de inglés e lingua española, aprende a elaborar o pan máis típico (Brezel), coñece os lugares máis emblemáticos do sur da nazón e realizamos diversas saídas que nos permiten coñecer tanto vilas e ciudades cercanas (Stuttgart, Ludswigburg, Esslingen, Friburgo,…) como outras comunidades-estado.
A experiencia estética, literaria ou histórica vese personificada a través da figura e das obras de Hölderlin, Goethe, Schiller, Hegel,… nos lugares onde desenvolveron o seu pensamento e a súa vida. A lección histórica estudada nos libros faise presente coa visita ó campo de concentración de Struthof, cercano á Strasbourg, e tamén co paseo por München, capital do estado de Baviera e terceira cidade de Alemania por número de habitantes.
En definitiva, cremos que a experiencia dun intercambio internacional, o feito de compartir pupitre noutro estado europeo, visitar lugares significativos da historia, da economía, da arte e da literatura universal, supón un aliciente formativo moi importante, e complementa o labor educativo que desenvolvemos no noso Centro.
Mª Ángeles Ríos Gómez, J. Manuel Yáñez Dablanca
Coordinadores do intercambio.