A Área Pública da CIG (Ensino, Saúde e Administración) mobilizouse hoxe diante do Hospital da Costa contra os orzamentos da Xunta para 2015 e contra o Anteproxecto de Lei de Emprego Público. Denuncia que para o vindeiro ano mantéñense os recortes salariais dos empregados/as públicos/as -que xa perderon entre 2010 e 2014 o 30,9% do seu poder adquisitivo- e impóñense unhas taxas de reposición que afondarán na destrución do emprego e dos servizos públicos.
Adolfo Corral Calviño, delegado da CIG Saúde A Mariña explicou que con estas mobilizacións preténdese manifestar a “rotunda oposición” a uns orzamentos que “non teñen intención de recuperar nin o emprego, nin os salarios”.
Neste sentido, denunciou que nos últimos 5 anos acumulouse unha merma de poder adquisitivo do 30,9% e presentou un cadro no que se recolle a evolución do IPC e as consecutivas rebaixas salariais, que constatan esa perda continuada de salarios.
INDICE DE EVOLUCIÓN DO IPC E SUBA SALARIAL NOS ÚLTIMOS 5 ANOS (1-1-09 a 30-9-14)
| ANO | IPC GALIZA | IPC ESTADO | SUBA SALARIAL | DIF GZ | DIF ESTADO |
| 2009 | 2,6% | 2,1% | 2% | -0,6% | -0,1% |
| 2010 | 4,5% | 4,0% | -5% | -9,5% | -9,0% |
| 2011 | 3,6% | 3,1% | 0% | -3,6% | -3,1% |
| 2012 | 4% | 4% | -7% | -11% | -11% |
| 2013 | 2% | 1,6% | -4% (Autonómica) | -5,6% | |
| 2014 | (Xan. a Set.)0,6% | -0.5% | 0% | -0,5% | |
| TOTA | 17,3% | 15,3% | -18% | -30,9% |
Fonte: INE e Orzamentos Xerais do Estado e Xunta de Galiza dos anos correspondentes.
Denunciou ademais que os orzamentos limítanse a recoller as liñas marcadas desde Madrid, agás en aspectos como os retributivos nos que a Xunta ten competencias que utiliza para manter as reducións das pagas extra, a diferenza do persoal do Estado.
Por iso subliñou que con estas mobilizacións o que se demanda é un cambio nas políticas neoliberais do executivo galego; a recuperación do poder adquisitivo do persoal dependente da Xunta de Galiza e a supresión dunhas taxas de reposición que afogan os servizos públicos minguando a súa calidade. Isto xunto coa exixencia de que se devolvan, enteiras, as pagas extra de todos estes anos.
Corral Calviño tamén alertou da extrema gravidade do Anteproxecto de Lei de Emprego Público de Galiza, que “ten pouco de emprego e de público” e denunciou que o seu obxectivo é, máis unha vez, a destrución dos servizos públicos.
660 millóns de € de orzamentos menos, desde 2009, para o ensino público
Os orzamentos de 2015 afóndase aínda máis no “desmantelamento do ensino público”. Lembran as carencias que se evidenciaron no comezo deste curso escolar, nomeadamente canto a profesorado e consideran absolutamente insuficientes as taxas de reposición do 50% para o Ensino. Sobre todo tendo en conta que desde 2009 xubiláronse 4.000 profesores/as e que só houbo unha oferta de emprego de 585 prazas.
Por iso reclaman que como mínimo se convoque unha oferta de emprego, en todos os niveis educativos, en número igual ás vacantes que por xubilacións ou outros motivos, se produzan.
Xunto a isto denunciaron que para 2015 continúan a reducirse os orzamentos en Educación, que diminuíron desde 2009 en 660 millóns de euros, un 33% menos respecto a hai cinco anos. Alertaron que isto provocará que se amplíen as diferenzas sociais ao reducirse os servizos complementarios e a atención ás necesidades especiais, porque poderán acceder a estes servizos quen teñan cartos para asumir o seu custo. Fronte a iso denunciaron que, porén, destínanse 250 millóns de euros para o ensino privado concertado.
Un mínimo de 11 millóns de euros dos orzamentos de Sanidade para pagar os canons das privatizacións
Os orzamentos en Sanidade Pública recortáronse en 400 millóns de euros desde o ano 2009, e incrementáronse en 11 millóns de euros as partidas orzamentarias destinadas a sanidade privada.
Fronte a isto, denunciou que baixan os orzamentos destinados a Atención Primaria, Protección e Promoción da Saúde Pública, a Investigación Sanitaria e a formación de graduados e postgraduados.
De feito en declaracións feitas hoxe á prensa polo Xerente Provincial da sanidade de Lugo, García Quintáns, anuncia a súa intención e a do SERGAS en continuar recortando e destruíndo prazas nos Centros de Saúde de Atención Primaria da nosa comarca.
Para CIG Saúde A Mariña tamén é absolutamente insuficiente a anunciada taxa de reposición do 50%. Neste sentido, lembrou que se amortizaron máis de 3.000 prazas entre o 2011 e o 2014 e esixiu o cumprimento da lexislación vixente para que se poña en marcha o sistema numérico de identificación de prazas, a fin de saber exactamente cal é o cadro de persoal do SERGAS.
Dende CIG Saúde tamén denunciaron que a Xunta nin sequera vai devolver a parte devengada da paga extra de 2012 ao completo como no resto do estado, senón en dous prazos, un en 2015 e outro en 2016. Queren deixar claro que isto non é un acto de boa fe tal como están a vender, senón obrigada polas múltiples sentenzas ditadas por distintas instancias xudiciais.
Dende CIG-Saúde A Mariña demandan cobrar o 100 % da paga extra, ao igual que acontece no resto do estado español, xa que aquí na Galiza, o PP aplicou un recorte autonómico no 2013 polo que as empregadas e empregados públicos non cobran dende entón a totalidade da devandita paga, recorte que Feijóo mantén para 2015.
A central nacionalista tamén esixe a recuperación da carreira profesional e denuncian a actitude mantida pola Consellaría de Sanidade negando o dereito que teñen os profesionais do sistema sanitario galego ao recoñecemento profesional.
Foi baixo o título: Coñece os teus dereitos como consumidor, enmarcado nesta ocasión nunhas xornadas participativas nas que se abordarán neste mes de maio temas moi interesantes para o consumidor baixo o epígrafe "Consumo en Ruta" en colaboración coa Xunta de Galicia e da asoc. Xubilados Terramar. As próximas charlas serán os martes 20 e 27 de maio, no local social da asoc. de Xubilados Terramar, na Casa do Mar.
Co gallo do día das Letras Galegas, levarase a cabo un Obradoiro de oralidade das mulleres. Empregaranse as ferramentas do ciclo do ano e ciclo vital e farase percorrido polos cantares de tradición oral e os contextos nos que se producen. Branca Mª Villares Naveira dirixe este obradoiro; ela é docente de música tradicional galega na especialidade de canto e as percusións de man, con mais de 25 anos de bagaxe na investigación, tamén é divulgadora da tradición oral das mulleres galegas. Terá lugar este xoves, día 15 de maio no Salón de Actos do centro ás 16:30 horas. Máis información e matrícula: https://
Na presentación do cartaz participou o alcalde, Demetrio Salgueiro, acompañado das concelleiras Dolores, Cristina e Tamara e dos membros da Comisión de festas Benigno, Carlos, Borja e Dalmacio. Todxs convidan a veciños/as e visitantes a desfrutar deste día de alegría e facelo vestidxs de branco.
Este xoves 15 de maio, ás 20:30h na Libraría Bahía de Foz celebrarán as letras galegas coa presentación do libro 'Bóveda, memoria do lugar' a cargo do seu autor, Óscar Górriz. Trátase dun libro de recollida etnográfica e musical con textos e fotografías. Haberá tamén música de pandeireta arrufando a presentación. Ademais o venres haberá un 10% de desconto en todos os libros escritos en galego, para celebrar as nosas letras e promover a compra de libros na nosa lingua.
A mañá do domingo 18 Guía tu día organiza a ruta da Seimeira no concello da Pontenova. "Unha interesante andaina de 9km circular e de dificultade media ubicada na parroquia de Bogo, onde descubriranse as pintorescas aldeas de Vilarxurbín e Sanxés, varios miradores e a seimeira. Ademais das Fragas de Teixido e Sanxés que son espectaculares" comenta a guía. A xornada rematará cunha comida no restaurante O Lar de Balbina. O prezo da ruta guiada é de 10€ e 20€ a comida. O grupo está limitado a 20 persoas. Máis información e reservas no 654 99 68 57 ou guiatudia@gmail.com.
Na presentación, este luns, participou Leandro Quelle e Rubén Rubiños como membros da Asociación Equina A Medela, organizadora da feira, acompañados polo alcalde, Demetrio Salgueiro, e a concelleira de agricultura, Dolores Meitín. Dende o Concello de Xove convidan a toda a veciñanza e tamén a todos aos afeccionados/as ao mundo do gando a que se acheguen disfrutar dunha xornada familiar dende as 9.30, con importantes premios e sorteo dun poldro.
Bruno Arca, alumno de 1º Ciclo Medio de Cociña, acadou un 4º posto no Combiguru Challenge celebrado en Venecia os días 8 e 9 de maio. O concurso consiste en realizar unha serie de probas na APP da compañía, famosa polos seus fornos. Os seleccionados van a Venecia para participar no concurso no cal teñen que preparar un prato e unha sobremesa durante tres horas, sempre empregando os fornos da marca. Os dous días de concurso inclúen visitas guiadas pola cidade de Venecia e formacións con cociñeiros de prestixio como Paolo Casagrande, do Restaurante Lasarte de Barcelona con tres estrelas Michelin.
