O Bloque de Viveiro convoca á “demolición simbólica” dos galpóns do muelle vello

Viveiro, 14 de novembro de 2014. Os nacionalistas de Viveiro convocan ás veciñas e veciños a unha “Demolición Simbólica” dos galpóns do muelle vello , que terá lugar o sábado 15 de novembro ás 13.00 horas no propio peirao. Convidan ás veciñas e veciños a levar, casco, pico e pala, co obxetivo de mostrarlle a Portos de Galiza e ao Partido Popular, que estamos fartos das mentiras, dos enganos e de que traten á cidadanía como parvos.

Afirman dende o BNG, que os últimos anuncios do inicio da demolición realizados polo Portavoz do Partido Popular de Viveiro, son un auténtico despropósito, unha mentira á cara das veciñas e veciños, enganando sobre as datas, e unha falta de respecto ao Concello de Viveiro como Institución.

Bernardo Fraga, Portavoz do BNG, declarou “estamos fartos, dos enganos, das mentiras e da manipulación co muelle vello por parte do Partido Popular, fartos de que traten ás veciñas e veciños de Viveiro de parvos, así que se non tiran eles os galpóns, tirarémolos nós, aínda que sexa de forma simbólica”

Os nacionalistas denuncian, que na última visita do Presidente de Portos a Viveiro, na que participou o Sr. Bouza, non sabemos en calidade de qué, anunciaron que os trámites administrativos son longos, e contradín ao propio portavoz do PP de Viveiro cos prazos de execución”. O Partido Popular demostra, que non ten intención clara co muelle vello, non ten proxecto, están rexidos pola improvisación e buscan facer algún movemento antes das eleccións municipais, para disimular o absoluto abandono no que a Xunta de Galicia ten ao Concello de Viveiro.