A choiva e o vento impediron que a Praza do Convento de Meira se convertera por un par de horas no taboleiro de xogo para a disputa da VII xornada la Liga Regular de Billarda, polo que a serpe multicolor da LNB tivo que buscar abeiro no pavillón de deportes.
Contra as 15.30 horas, os máis de medio cento de palanadores comezaron a lanzar ó ar as súas billardas cara o varal. Na primeira carreira da tarde quedou patente que era xornada propicia para os varados xa que Cortón (de O Cadaval) abriu o camiño e fixo o primeiro; logo, aínda que o tentou, non puido repetir sorte, pero outros si o fixeron destacando Markytos con tres e Lois Pirucha con dous. En total foron dezaseis os tiros directos acadados, a segunda mellor marca da tempada.
O bo comezo dos palanadores de “O Cadaval” e algún tropezo dos seus rivais máis directos, os Billardeiros Musicais, fixeron imaxinarse os primeiros que era o momento de vengarse da aldraxe sufrida en cancha propia na derradeira xornada. Pero a deusa fortuna, as fadas ou as meigas, achegáronse ós mariñáns e trocaron a sorte duns e outros, de tal xeito que no ecuador da xornada as augas voltaban ó rego e igualábanse as puntuacións que finalmente caeron do lado dos músicos Billardeiros que voltaron a gañar como equipo, aínda que só pola pequena marxe de dous puntos.
No tocante, ós enfrontamentos individuais, a pista rápida acostuma a dar algún que outro susto, e no pavillón de Meira non podía ser doutro xeito. Mais dun dos favoritos quedou aparcado na cuneta produto dalgún tropezo inesperado ou do acerto dos rivais, chegando invitos ó final da xornada e, polo tanto, donos do podio tres palanadores. Entre eles xogáronse en tres carreiras o caixón ó que terían que subir. Dous veteráns moi acostumados ós laureis e un novato con gañas de acomodarse entre os mellores: Santi de “Carabullo de Teixo” que finalmente foi o primeiro gañando as tres roldas de desempate, Markytos de “Billardeiros Musicais” que foi segundo e Iván de “Pena Verde”, o terceiro.
Iván acadou un merecido premio ó bo facer e, quen sabe se foron os nervos e a inexperiencia de medirse con dúas estrelas, os que lle impediron subir algún escalón máis. Un palanador a ter en conta daquí en diante.
Tamén subliñar ás palanadoras Geni, Geles e Sara. A primeira é xa veterana na competición. Temible rival para calquera, home ou muller. Domina tódalas superficies e ten gañado xa máis dun aberto. As outras dúas son primeirizas na competición, pero deselvólvense moi ben e xornada a xornada mantéñense nos primeiros postos. As tres, e por esa mesma orde, comandan a xeral en donas.
Lola Eiras e César, máis coñecido por Cascarillas, anfitrións do Aberto ós que se xuntou Flores pola LNB, fixeron entrega dos agasallos correspondentes, que facendo honra ás datas do Antroido que se achegan, consistiron nun lacón, cachola, costela, chourizos, grelos e patacas para os tres primeiros e para o equipo da xornada. Que aproveite o cocido! E ata a xornada de Mondoñedo.
As clasificacións logo da sétima xornada quedan así:
Individual: Markytos 64 p., Daniel 60 p., Kiko 53 p., Franco e Pepe Outeiro 50 p.
Equipos: Billardeiros Musicais 238 p., O Cadaval 221 p., e Carabullo de Teixo 182 p.
Varados: Markytos 12, Charli e Daniel 5, Santi e Tonecho 3.
A conselleira do Medio Rural, María José Gómez, acompañada pola directora xeral de Relacións Institucionais e Parlamentarias, Sandra Vázquez, e a directora xeral de Urbanismo, Encarnación Rivas, asistiu á ofrenda da Virxe dos Remedios en Mondoñedo.
Era o único ocupante do turismo e os Bombeiros de Vilalba tiveron que excarceralo. Ao fío das 13:30 horas, un particular informou ao 112 Galicia dun coche que se saíra da vía e acabara batendo contra unha árbore no quilómetro 75 da N-640, en Ludrio (Castro de Rei). O propio alertador sinalou que o accidente semellaba grave polo estado no que quedara o vehículo. Cando chegaron ao lugar, os servizos de emerxencias confirmaron que só había unha persoa implicada,un home que resultou falecido e foi excarcerado polos bombeiros. No operativo participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada.
O director xeral agradeceu aos membros e traballadores da entidade todo o seu labor na defensa dos dereitos dos máis novos. Deste xeito, puxo en valor a súa traxectoria e o compromiso cun modelo integrador e inclusivo no que os menores do sistema de protección vivan nunha contorna totalmente familiar. Neste sentido, Jacobo Rey fixo fincapé na importancia da colaboración entre a Xunta e o tecido social para seguir fortalecendo un sistema que garanta o benestar dos nenos e adolescentes, con centros como San Aníbal que conforman un auténtico fogar.
A alcaldesa Marta Rouco inaugurou a cita, que abriu coa IV Volta Ciclista á Terra Chá e cunha programación centrada na relación entre Galicia e Cuba e na memoria da emigración. Houbo unha mesa redonda sobre o Centro Galego da Habana, a exposición Galicia Imaxinada e música, ademais dunha mostra de xornais antigos. Rouco reivindicou a importancia de lembrar a emigración galega e apelou a mirar con humanidade as migracións actuais, destacando tamén o papel das asociacións culturais das parroquias na conservación das tradicións. A feira continou con desfile de época, xantar popular, xogos, animación, baile cubano, foliada, queimada e propostas musicais e artesanais ata a noite.
Na IV Festa dos Ovos Rotos con Chourizo e Feira de Artesanía, María José Gómez puxo en valor a importancia económica e social deste produto e o papel da artesanía alimentaria, con sete operadores presentes. Subliñou que o evento consolídase como unha cita que promove a gastronomía galega e recupera oficios tradicionais, dinamizando a vida económica e social de Castro de Rei.
Ocorreu minutos antes das 11:30 horas. Unha persoa foi trasladada ao hospital tras resultar ferida na colisión entre un coche e un autobús no quilómetro 512 da A-8 en sentido A Coruña, en Vilaframil (Ribadeo). Entre os alertadores estiveron as persoas que viaxaban no coche, que puideran saír do vehículo. Por outra banda, o autobús conseguiu deterse uns metros máis adiante. Ao punto desprazáronse Urxencias Sanitarias de Galicia-061, a Garda Civil de Tráfico e os servizos de mantemento da autovía.
O próximo luns 14 de setembro comeza un novo curso de español dirixido a persoas estranxeiras da man de Ecos do Sur, que se desenvolverá ata o 9 de outubro. A formación será dun total de 80 horas e as clases terán lugar de luns a venres, de 9:30 a 13:30 horas no Centro de Formación Ocupacional. O concelleiro de Inmigración, Mario Pillado, destacou o valor destas propostas para “facilitar ferramentas útiles ás persoas estranxeiras residentes no municipio e favorecer a súa integración, tanto social como administrativa”.
