Burela, a 20 de marzo de 2015. O Concello de Burela contará no presente ano cun presuposto lixeiramente superior ao de 2014, xa que será de 6.542.850’44 euros, 103.511’81 euros máis que o exercicio do ano pasado. Os datos foron feitos públicos este venres polo alcalde, José María González Barcia, nunha rolda de prensa á que asistiron varios membros do seu equipo de goberno.
No que se refire á partida de ingresos, a suma dos impostos directos, indirectos e taxas e prezos públicos pasan de 4.011.448 de euros en 2014 a 3.869.525 euros. Dito doutro xeito, o que vai recadar o Concello en 2015 supón un 3’6% menos ca en 2014. Isto quere dicir que os cidadáns de Burela en conxunto deixarán de pagar un total de 142.000 euros con respecto ao ano anterior, o que significa unha media de 14’5 euros por habitante.
González Barcia afirmou: “isto demostra que o que dixemos no seu día o cumprimos. Dixemos que íamos baixar os impostos, as taxas e os prezos públicos e iso é o que estamos facendo, xa que en conxunto vamos pagar menos ca en 2014”.
Segundo se desprende dos datos que figuran nos presupostos, os impostos directos baixan un 1’6% e as taxas e os prezos públicos baixan nun 6’5%. “Estamos deixando nas mans dos cidadáns 142.000 euros, máis o que deixa de subir en conxunto o IBI, a contribución, tal e como anunciamos que íamos facer, e isto comezarán a notalo os cidadáns en breve. Sabemos que non é unha gran baixada pero o feito é que os impostos, en vez de subir, baixan”, explicou o rexedor.
O alcalde burelés dixo que “en cambio, as transferencias correntes, ou sexa, os ingresos derivados fundamentalmente da participación nos tributos do Estado, increméntanse en 144.700 euros, pasando dos 2.394.464’61 euros do 2014, a un total de 2.539.168’33 euros, o que supón un aumento do 6%, que compensa a baixa de ingresos derivados dos impostos directos e indirectos, e das taxas e prezos públicos, tal e como prevíamos desde o equipo de goberno”.
No que se refire aos gastos, os gastos social e educativo suman practicamente o 30% do total, “o que demostra a sensibilidade deste goberno municipal”. Barcia afirmou que “só o gasto social ascende a 1.367.521 euros, e o gasto educativo a 545.016 euros, o que fai un total de 1.912.53 euros”.
Se ben é certo que os investimentos reais e as transferencias de capital roldan os 345.000 euros, o 5’25% do presuposto, Barcia, que recoñeceu que “non é unha cantidade moi grande”, afirmou que “se contemplan partidas para facer os novos vestiarios do campo de fútbol de herba artificial da Marosa, que temos que recoñecer que non fomos capaces de facelos nos prazos que eu mesmo dixen, pero que se construirán, e tamén para abordar a parte correspondente ao Concello da construción da nova escola infantil. Hai que dicir que o incremento do presuposto municipal do presente ano queda absorbido totalmente pola achega municipal para facer a nova escola infantil”.
O alcalde engadiu que “con todo existe partida suficiente en gasto corrente, practicamente a mesma cantidade que o ano pasado, ou sexa case que dous millóns setecentos mil euros, para atender o mantemento e conservación de todo aquilo que é da nosa competencia”.
No tocante ás subvencións, González Barcia indicou que “un ano máis, o equipo de goberno, cumprindo a palabra dada, mantén as subvencións, o que significa un esforzo importante para a economía municipal. Cando o presuposto estea aprobado definitivamente, poñerémonos a traballar para redactar e asinar os convenios coas distintas asociacións e colectivos”.
No apartado de débeda, o alcalde manifestou que “a contía total que se destina a este concepto no presente ano ascende a 480.562 euros. Se non tivéramos que abonar o crédito das facturas que outros deixaron sen pagar, e se non tivéramos que pagar a débeda do goberno socialista de Cervo anterior á segregación, a situación sería sensiblemente mellor”.
Finalmente, González Barcia afirmou que “o presuposto cumpre cos obxectivos básicos que este goberno se fixou hai catro anos: non gastar máis do que se ingresa, pagar o que se debe e canto antes, atender preferentemente os servizos sociais e educativos, manter e conservar as infraestruturas coas que contamos en condicións, e tamén baixar os impostos, como queda demostrado con este presuposto. Se ben é certo que temos un pequeno problema no cumprimento da regra de gasto, algo que se corrixirá entre este ano e o próximo, os presupostos de 2015 nos permitirán, baixando impostos, manter o nivel de servizos que temos, que é moi alto”.
Dez minutos antes das 21:30 horas do xoves, o 112 Galicia foi informado polo persoal de Adif dun tren detido no medio dun túnel en Mogor, Mañón, debido a unha chapa metálica no medio da vía. Así, aínda que as doce persoas que viaxaban a bordo estaban ilesas, precisaban medios de rescate para baixalas do convoi e desprazalas ata o apeadeiro máis próximo. Nestas tarefas colaboraron a Garda Civil, os Bombeiros do Eume, o GES de Ortigueira e os voluntarios de Protección Civil de Mañón. Finalmente, as persoas foron rescatadas e evacuadas a outro tren, que as levou ata o apeadeiro sen maiores complicacións. Desde alí, continuaron a súa viaxe en taxi.
Competirán durante tres días xunto a outras dezaseis escolas de todo o mundo, elaborando catro propostas de pizza: Polbo á galega, con polbo galego, queixo San Simón e allada picante; Bosque galego, con crema de castañas e mel picante; Terra meiga, con zorza picante; e Rapadoira, con setas, queixo azul e pera. As estudantes viaxan acompañadas pola súa profesora, Conchi Carreiras, coa que levan tempo preparando as receitas. Esta é a terceira participación do IES de Foz neste certame, no que xa acadaron un segundo posto en edicións anteriores. A actividade forma parte do programa Erasmus+ da FP, financiado pola Unión Europea, que facilita a participación do alumnado en competicións de habilidades profesionais por toda Europa.
A xornada comezará ás 12:00 h cun faladoiro titulado “Vizoso e nós”, no que participarán Pepe Penabade, Pepe Blanco, Caxigueiro, Aurelia Balseiro e Mª Cristina Rubal González, moderados por Antonio Reigosa. Ás 13:20 h abrirase a exposición “Xosé Vizoso. O neno que debuxou un cabalo”, que permanecerá dispoñible durante as festas de San Lucas. A partir das 13:45 h terá lugar o acto de inauguración e descuberta da placa da nova rúa Xosé Vizoso, na Praza da Fonte Vella, coa presenza de autoridades, familiares e amizades do artista. As persoas asistentes recibirán no auditorio unha lámina cunha obra de Vizoso como agasallo.
Ás 15:15 horas deste martes, un particular solicitou asistencia sanitaria tras a caída dun raio no lugar de Castro de Igrexa (Cazás, Xermade). Varias persoas sentiron os efectos da descarga eléctrica e unha delas quedou atolada. Tras dar aviso ao Servizo de Urxencias Sanitarias de Galicia-061, Garda Civil e Protección Civil, a persoa afectada foi evacuada consciente ao Hospital Universitario Lucus Augusti.
A exposición, instalada no Centro Comarcal Pazo de San Tomé, invita a observar con calma, descubrir historias e poñer en valor un patrimonio vivo que forma parte da nosa identidade. Unha maneira diferente de achegarnos ao mundo rural que tanto significa para As San Lucas.
Co sol ocultándose e a lúa asomando entre as torres de Donlebún, o músico e divulgador reivindicou o poder evocador e transformador do bravú fronte á morriña paralizante. Na sala de lectura da biblioteca, Souto explicou a evolución do rock bravú no imaxinario galego, evocando as músicas populares que acompañaron durante décadas os remolques dos pascualiños e os labores comunitarios, e lembrando a vitalidade de grupos como Skornabois, Diplomáticos de Monte Alto, Xenreira, Zënzar, Pinto de Herbón ou os Rastreiros. A boa lembranza da súa anterior visita levou ao artista a pechar a velada interpretando o “Himno de Ribadeo”, composto por Arturo Mogo, nun final cheo de afecto pola vila e pola súa identidade cultural.
A viaxe, enmarcada no proxecto «Relevo Xeracional: O Futuro do Mar» e organizada en colaboración co GALP Itsas Garapen Elkartea, permitiu achegarse a iniciativas como Kofradia Basque Seafood, a Escola de Pesca de Ondarroa, AZTI, Albaola ou o Itsas Museo de Donosti, así como a proxectos vinculados directamente á actividade pesqueira e á divulgación, incluíndo o uso de realidade virtual. O intercambio con Euskadi permitiu coñecer modelos que combinan formación, investigación, transmisión do coñecemento e modernización do sector, contribuíndo a identificar novas vías para facilitar a incorporación da mocidade á actividade pesqueira e garantir a continuidade das comunidades costeiras galegas.
