A candidatura do BNG de Ribadeo ás eleccións municipais do vindeiro 24 de maio de 2015 foi presentada este sábado 21 de marzo no Parador de Turismo de Ribadeo. No acto estiveron presentes Fernando Suárez Barcia, candidato á alcaldía, xunto cos membros da candidatura, e Ana Ermida, responsábel comarcal do BNG na Mariña, e Antón Veiga, vicepresidente primeiro da Deputación Provincial de Lugo.
É unha lista composta por 25 homes e mulleres. 17 titulares e 8 suplentes. É unha lista representativa de persoas da Vila e do campo. Unha lista de homes e mulleres que representa os diferentes sectores laborais, económicos e de movementos sociais, deportivos, culturais, etc. de Ribadeo. Que conta con xente orixinaria doutros concellos cercanos ao noso pero que Ribadeo, como capitalidade comarcal foinos atraendo a nivel laboral, residencial, etc. e hoxe en día son uns mais de nós.
Esta lista que se presenta, está conformada a modo de cremalleira, onde temos o mesmo número de persoas por razón de xénero, porque cremos na igualdade de dereitos entre o home e a muller.
Trátase tamén con esta proposta de combinar a experiencia e a xuventude. Non só pola idade, que tamén, senón porque hai xente que repite pero tamén se incorporan novas persoas, moitas delas que nunca participaron da política activa, co obxectivo de repartir mellor o traballo e aportar novas ideas para Ribadeo.
Tamén se quixeron achegar nesta lista a idea de sumar diferentes visóns do nacionalismo e do galeguismo político, porque se queren superar situacións desagradables de escisión e desencontros que se deron no pasado recente en todo o país. Faise isto así, porque desexamos que en Ribadeo prenda a chama da acción común para defender o noso país, a nosa xente, a nosa identidade e mais os nosos sectores produtivos cunha soa voz e cunha acción coordinada.
Para Ana Ermida, responsábel comarcal do BNG, foi un orgullo presentar a candidatura do BNG de Ribadeo para as Eleccións Municipais de maio de 2015. Segundo Ana Ermida, esta lista de homes e mulleres representan a honestidade, o traballo e a solvencia para o Concello de Ribadeo. O BNG é quen de seguir apostando por Ribadeo, cunha receita tan simple como continuada no tempo: planificación, capacidade de traballo, boa xestión e honradez. E por suposto, orgullo de ser ribadenses e galegos.
Pola súa banda, Antón Veiga destacou o importante labor levado a cabo desde o Concello de Ribadeo e o apoio que desde as áreas de goberno xestionadas polo BNG na Deputación se lle dou a este concello. Proxectos como o pavillón de deportes e a residencia da terceira idade non serían posibles sen o empeño do pobo de Ribadeo e sen o esforzo económico levado a cabo desde a Deputación de Lugo e o propio concello de Ribadeo. Precisamente esa maneira distinta de facer política, de apostar polos servizos públicos, de apoiar a sanidade pública, un ensino de calidade, e de defender aos que sofren a inxustiza (como no caso dos afectados polas preferentes e subordinadas) é o que nos move, segundo palabras de Antón Veiga, a seguir loitando por unha sociedade máis xusta, por un país capaz de dar resposta aos seus problemas sen necesidade de que dende fóra nos veñan aportar solucións máxicas. O traballo en concellos como o de Ribadeo, Mondoñedo ou Riotorto, Allariz, Carballo ou Pontevedra, é o noso facho que mostra ao resto do país a nosa maneira de facer política. Fagamos que eses exemplos se irradien por novos concellos e se estenda máis esta maneira de defender o noso con políticas centradas en Galiza e non pendentes dos designios dalgúns despachos madrileños.
A intervención de Fernando Suárez Barcia centrouse no labor levado a cabo neste mandato. Segundo Suárez Barcia, “hai catro anos recibimos o encargo de sacar adiante o Concello de Ribadeo. O apoio recibido foi maioritario. E procuramos xestionalo co mesmo espírito de diálogo que nos caracterizou sempre”. Fixo referencia ao novo número do Parladoiro que estes días está a chegar ás casas de toda a veciñanza. Nel bótase unha ollada ao traballo feito. Recoñécese que algunha cousa quedou por facer, pero en conxunto ben se pode dicir que a realización dos obxectivos marcados está bastante avanzada (como é o caso da residencia da Terceira Idade) ou totalmente cumprida (como foi a aprobación definitiva do PXOM, a construción dun novo pavillón de deportes, a peonalización de moitas das nosas rúas e unha promoción de Ribadeo como nunca ata agora se lograra)
Segundo Fernando Suárez Barcia, toca agora tirar conclusións, tanto á veciñanza sobre o labor feito, como ao propio equipo de goberno. Este, vese con folgos para seguir sacando adiante novas ideas que foron xurdindo ao longo deste mandato. Algúns compañeiros e compañeiras piden o relevo. Outros están dispostos a sumarse a este proxecto. Preséntase hoxe unha lista renovada en parte, e que en parte achega a experiencia acumulada ao longo destes anos.
LISTA DO BNG DE RIBADEO PARA CONCURRIR ÁS VINDEIRAS ELECCIÓNS MUNICIPAIS DE MAIO DE 2015
1-.Fernando Suárez Barcia
2.-Mari Luz Álvarez Lastra
3.-Vicente Castro Reigosa
4.-Ana María Martínez Fernández
5.-Xosé Farruco Graña Rama
6.-Sonia Meilán Vizoso
7.-David Ribas Peña
8.-Paz Ermida Igrexas
9.-Jorge Díaz Freije
10.-Vanesa Yanes Rivas
11.-Horacio Cupeiro Rodríguez
12.-María Teresa González Piñeiroa
13.-Pablo Vizoso Galdo
14.-Paz Ramil Maseda
15.-José Rocha Fernández
16.-Teresa Díaz Estevez
17.-Martín Graña Pérez
Suplente 1º.-Andrea Martíns Fernández
Suplente 2º.-Marcos Fernández Fernández
Suplente 3º.-Rocío Díaz Mesa
Suplente 4º.-Pedro Fernández Villamil
Suplente 5º.-María Dolores García Docobo
Suplente 6º.- José Luís Baamonde Reigosa
Suplente 7º.-Alicia Sarmiento González
Suplente 8º.-José Antonio Ramil Acebo
Esta actividade, organizada polo Concello de Lourenzá, será na praza César Chavarría Pacio e haberá tres funcións: ás 13:00, ás 18:30 e ás 20:00 horas. A entrada é de balde por orde de chegada ata completar aforo. A alcaldesa de Lourenzá, Rocío López, destaca que “a maxia é unha desas propostas que sempre ten unha acollida moi especial en Lourenzá. Gusta aos pequenos, pero tamén consegue sorprender e ilusionar aos maiores, converténdose nun plan perfecto para gozar en familia”.
Xunto a autoridades locais, destacou a importancia de preservar as tradicións e lembrou que a Deputación destinou este ano 400.000 € ao Concello para servizos básicos. A festa, creada en 1992 e impulsada pola Asociación de Amigos da Malla, busca recuperar e poñer en valor este oficio tradicional. A programación incluíu documental, obradoiros, música, exposicións de maquinaria antiga e actividades para nenos.
Ata a Cedofestiña, que tivo lugar onte no Pazo de Cedofeita, se achegaron o alcalde, Dani Vega, e a concelleira de Cultura, Begoña Sanjurjo. O Concello colaborou unha edición máis coas Vacas Fracas.
Con motivo desta data tan especial, o alcalde Demetrio Salgueiro, xunto ás concelleiras Tamara Soto e Mª Dolores Meitín, visitouna para felicitala persoalmente e compartir con ela unha celebración tan emotiva. O Concello destacou a alegría e o orgullo que supón chegar ao século de vida e trasladoulle os seus parabéns, desexándolle saúde, felicidade e moitos máis anos rodeada dos seus seres queridos.
A clientela aproveitou esta cita para facerse con artigos de tempada a prezos moi interesantes. É a segunda vez neste mes de agosto que se celebrou o Comercio na Rúa en Ribadeo. Para a organización desta campaña Acisa contou coa colaboración do Concello de Ribadeo, Comercio Galego e Xunta de Galicia.
Villares visitou a exposición fotográfica dedicada a Calvo-Sotelo, instalada na praza de Pancho Maseda, que forma parte do programa conmemorativo do centenario. A mostra reúne unha selección de imaxes seleccionadas pola propia familia do expresidente para achegar á cidadanía diferentes momentos da súa traxectoria persoal e política. A conmemoración, que se estende ao longo de todo 2026, busca poñer en valor a figura de Calvo-Sotelo e a súa relación con Ribadeo, onde deixou unha importante pegada vinculada, entre outras cuestións, ao impulso de infraestruturas.
Durante case dúas horas desenvolveuse unha conversa aberta arredor do mundo do espírito e do contido da obra, nun encontro ao que asistiu un grupo numeroso de persoas dispostas non só a escoitar, senón tamén a dialogar e compartir reflexións. Tras a intervención inicial de Pepe Peinó como responsable do proxecto, tomou a palabra o escritor Lionel Rexes, quen achegou novas perspectivas antes de abrir o debate ao público. As opinións, argumentos e matices sobre relixión, espiritualidade, Deus e os valores que sustentan a convivencia foron enchendo o espazo nun ambiente participativo e respectuoso, no que as diferenzas quedaron en segundo plano fronte á forza do diálogo, a solidariedade e o afecto.
