Numeroso público participou na presentación este venres 17 de abril en Mondoñedo no salón de actos do Centro Comarcal do libro “Galicia Encantada. O país das mil e unha fantasías”. No acto interviñeron a ilustradora, Orlando González, alcalde Mondoñedo, Francisco Piñeiro e Fran Bouso, colaboradores da publicación, Lois Pérez, narrador oral, e Antonio Reigosa, o autor e coordinador da edición, Antonio Reigosa.
“Galicia Encantada. O país das mil e unha fantasías” é unha versión impresa, reducida, que publica Edicións Xerais de Galicia na colección LibroX e que sae á rúa para celebrar o décimo aniversario da web Galicia Encantada, Enciclopedia da Fantasía Popular de Galicia (http://www.galiciaencantada.com), un proxecto que está na rede desde marzo de 2005.
Ao tempo que se renova a web publícase este libro con 101 relatos en coautoría con 52 autores e autoras, entre eles nomes como os do portugués Alexandre Parafita, o do brasileiro Romyr Conde, ou Antonio García Teijeiro, Marta Dacosta, Xabier López Rodríguez, Xabier P. DoCampo, Calros Solla, Rafa Quintía , Isidro Novo ou Adela Figueroa. A xeografía dos relatos é practicamente toda Galicia e a temática a dos contidos habituais da web.
Entre os relatos algunhas xoias inéditas como “A verdadeira historia da capadora de Cuntis “A Lorena Bobbit galega”, de Marcos Seixo Pastor, “O conto do lobo incendiario” do escritor zamorano-galego Xabier López Rodríguez, lendas urbanas que tratan do roubo de órganos, de construtores suicidas, do significado ou linguaxe das zapatillas que se colgan dos cables eléctricos, as referencias galegas da historia do home santo que é quen de colgar o seu abrigo da “vara de sol”, as propiedades da “Man de Gloria”, o amuleto que se fabrica coa man dun aforcado.
No acto de presentación fíxose especial referencia aos relatos mindonienses e mariñaos recollidos na publicación: A casa encantada de Portocelo (Xove), O pirata Xan de García (Foz), A cova de San Xoán Vello (Viveiro), A cruz de Pau da Vella (O Valadouro-Viveiro-Xove), Lendas do castro da Recadieira (Mondoñedo).
Orlando González evocou a figura humana e literaria de Eduardo Galeano polo seu recente pasamento quen, por certo, facía uso regular da literatuta oral sudamericana para “celebrar a fantasía”.
Fran Bouso falou da súa experiencia como meste coordinador de alumnos que aportan información ao libro, neste caso sobre Filomena Arias Armesto, A sabia de Torbeo (Ribas do Sil).
Francisco Piñeiro falou das lendas do seu Reguengo natal (A Fonte da Galiña) que figuran no libro e na web, e da man de Cunqueiro percorreu a actualidade dos tesouros que se esvaecen en paraíso fiscais.
Lois Pérez, poeta , mestre en Riotorto e narrador oral parafraseou cos súas historias “as mil e unha noites” e “as mil e unha fantasías” que dan subtítulo ao libro presentado.
O libro, en palabras do coordinador da edición, pretende achegar especialmente estes contidos a lectores pouco ou nada familiarizados cos temas da nosa tradición oral.
*Fotos: Marcos Candia.
Dez minutos antes das 21:30 horas do xoves, o 112 Galicia foi informado polo persoal de Adif dun tren detido no medio dun túnel en Mogor, Mañón, debido a unha chapa metálica no medio da vía. Así, aínda que as doce persoas que viaxaban a bordo estaban ilesas, precisaban medios de rescate para baixalas do convoi e desprazalas ata o apeadeiro máis próximo. Nestas tarefas colaboraron a Garda Civil, os Bombeiros do Eume, o GES de Ortigueira e os voluntarios de Protección Civil de Mañón. Finalmente, as persoas foron rescatadas e evacuadas a outro tren, que as levou ata o apeadeiro sen maiores complicacións. Desde alí, continuaron a súa viaxe en taxi.
Competirán durante tres días xunto a outras dezaseis escolas de todo o mundo, elaborando catro propostas de pizza: Polbo á galega, con polbo galego, queixo San Simón e allada picante; Bosque galego, con crema de castañas e mel picante; Terra meiga, con zorza picante; e Rapadoira, con setas, queixo azul e pera. As estudantes viaxan acompañadas pola súa profesora, Conchi Carreiras, coa que levan tempo preparando as receitas. Esta é a terceira participación do IES de Foz neste certame, no que xa acadaron un segundo posto en edicións anteriores. A actividade forma parte do programa Erasmus+ da FP, financiado pola Unión Europea, que facilita a participación do alumnado en competicións de habilidades profesionais por toda Europa.
A xornada comezará ás 12:00 h cun faladoiro titulado “Vizoso e nós”, no que participarán Pepe Penabade, Pepe Blanco, Caxigueiro, Aurelia Balseiro e Mª Cristina Rubal González, moderados por Antonio Reigosa. Ás 13:20 h abrirase a exposición “Xosé Vizoso. O neno que debuxou un cabalo”, que permanecerá dispoñible durante as festas de San Lucas. A partir das 13:45 h terá lugar o acto de inauguración e descuberta da placa da nova rúa Xosé Vizoso, na Praza da Fonte Vella, coa presenza de autoridades, familiares e amizades do artista. As persoas asistentes recibirán no auditorio unha lámina cunha obra de Vizoso como agasallo.
O sindicato denuncia a decisión unilateral da empresa de retirar días de descanso e implantar quendas que dificultan a conciliación. As concentracións serán nos centros de traballo de Foz (Uxío Novoneira s/n) e Ribadeo (Avda. Galicia 27). Lémbrase que non é unha folga e apélase á solidariedade da plantilla para defender as condicións laborais conquistadas.
Ás 15:15 horas deste martes, un particular solicitou asistencia sanitaria tras a caída dun raio no lugar de Castro de Igrexa (Cazás, Xermade). Varias persoas sentiron os efectos da descarga eléctrica e unha delas quedou atolada. Tras dar aviso ao Servizo de Urxencias Sanitarias de Galicia-061, Garda Civil e Protección Civil, a persoa afectada foi evacuada consciente ao Hospital Universitario Lucus Augusti.
A exposición, instalada no Centro Comarcal Pazo de San Tomé, invita a observar con calma, descubrir historias e poñer en valor un patrimonio vivo que forma parte da nosa identidade. Unha maneira diferente de achegarnos ao mundo rural que tanto significa para As San Lucas.
Co sol ocultándose e a lúa asomando entre as torres de Donlebún, o músico e divulgador reivindicou o poder evocador e transformador do bravú fronte á morriña paralizante. Na sala de lectura da biblioteca, Souto explicou a evolución do rock bravú no imaxinario galego, evocando as músicas populares que acompañaron durante décadas os remolques dos pascualiños e os labores comunitarios, e lembrando a vitalidade de grupos como Skornabois, Diplomáticos de Monte Alto, Xenreira, Zënzar, Pinto de Herbón ou os Rastreiros. A boa lembranza da súa anterior visita levou ao artista a pechar a velada interpretando o “Himno de Ribadeo”, composto por Arturo Mogo, nun final cheo de afecto pola vila e pola súa identidade cultural.
