O Concello de Cervo convoca as axudas ás entidades deportivas cunha partida de 29.900 euros

Cervo, 22 de abril de 2015.- O Concello de Cervo informa de que vén de convocar as subvencións dirixidas ás asociacións e clubs deportivos do municipio. Unhas axudas que concede todos os anos ás entidades deste tipo co obxectivo de apoialas no desenvolvemento da súa actividade.

En concreto, son subvencionables os gastos correntes derivados da realización das actividades de promoción deportiva ou participación en campionatos deportivos federados, e tamén os gastos xerais de funcionamento, conservación, mantemento ou reparacións menores da entidade sempre que non sexan investimentos. En canto á contía, o Concello dispón dunha partida total de 29.900 euros.

As asociacións ou entidades deportivas poden presentar a documentación ata o 7 de maio. Cabe destacar que estas axudas están financiadas ao 100% con fondos municipais.