O fútbol sala regresa a Cangas del Narcea en 2015

5 de xuño de 2015.- O fútbol salga regresa ao verán de Cangas del Narcea en 2015, coa segunda edición do Campus Mixto de Base, que terá lugar entre o 20 e o 25 de xullo. Xunto ao alcalde, José Luis Fontaniella, e o presidente de SD Narcea, José Alberto Andreolotti, o acto de presentación desta mañá, na casa de cultura da localidade, contou coa presenza da concelleira de Deportes, Marta Fernández Álvarez, o encargado municipal de Deportes, José Antonio Menéndez, e o coordinador do campus, o ex-xogador do CD Burela FS Peixes Rubén e actual segundo adestrador do equipo galego, Juanma Marrube.

O clínic de Cangas del Narcea volve ofrecer unha axenda ampla e variada para non rexeitar, destinada como na súa estrea ás categorías entre benxamín e xuvenil (6-17 anos). O alumnado terá a oportunidade de afondar no coñecemento do fútbol sala e o fútbol, coa participación de adestradores de Primeira División; os nenos/ás poderán compartir a pista con algunhas das referencias da máxima categoría do futsal en España pero tamén descubrirán moitas das experiencias e anécdotas destes profesionais. Haberá tempo para aprender e divertirse arredor do esférico, ademais de entretidas xornadas con actividades lúdico-recreativas, práctica doutros deportes, talleres e excursións.

Esta cita estará incluída na Xira 2015 da Fundación Imdecum, recoñecida como Fundación de Interese Galego pola Xunta de Galicia. Colaboracións con campus de base como o Mixto Internacional Burela FS Peixes Rubén dende 2010, ademais da organización de citas de referencia deportiva dentro e fóra de Galicia, como o Torneo de Fútbol Sala Base Memorial Rodrigo Maseda Lozano, son só algunhas das referencias do traballo de Imdecum neste ámbito, que impulsará a partir de 2015 con clínics noutros puntos da xeografía galega como A Fonsagrada, Burela, Alfoz-O Valadouro e A Estrada, continuando coas súas xa tradicionais colaboracións en Asturias.

Nos próximos días facilitarase toda a información sobre a matrícula.

Estrea de grande acollida
A localidade asturiana estreou o campus en 2014 con grande acollida. Un total de 35 alumnos gozaron das actividades coordinadas por Juanma Marrube con visitas de prestixio como o porteiro do Uruguai Tenerife Iago Barro, os capitáns do CD Burela FS Peixes Rubén, Iago Míguez e Edu, o xogador viveirense Christian Chao ou os técnicos Pablo Prieto, de Al-Wahda de Abu Dahbi, Diego Ríos, do Parrulo FS.