O Camiño Norte e a catedral de Mondoñedo, declarados Patrimonio da Humanidade pola UNESCO

AOs Camiños do Norte veñen de ser incluídos na Lista do Patrimonio Mundial da UNESCO no marco da 39ª sesión do Comité do Patrimonio Mundial do World Conference Center de Bonn.

Deste xeito, catro novas rutas do Camiño de Santiago polo norte penínsular súmanse ao Camiño Francés -recoñecido dende 1993-. Trátase do Camiño Primitivo, o Camiño da Costa, o Camiño vasco-rioxano e o Camiño de Liébana.

Pero, ademais da ruta do norte a candidatura promovida polos gobernos autonómicos de Galicia, Asturias, Cantabria, País Vasco e La Rioja, así como polo Ministerio de Educación, Cultura e Deporte do Goberno de España, inclúe tamén a distinción dun conxunto de 16 monumentos da máxima relevancia e valor cultural. Entre eles atópase a catedral de Mondoñedo e outros tres bens galegos: a Muralla e a Catedral lucenses e o Mosteiro de Sobrado dos Monxes.

Por Galicia transitan dúas das catro rutas: o Camiño da Costa, que comunica a cornixa Cantábrica con Compostela, e o Camiño Primitivo. O Camiño da Costa discorre por un total de 16 concellos: Ribadeo, Barreiros, Trabada, Lourenzá, Mondoñedo, Abadín, Vilalba, Guitiriz, Begonte, Friol, Sobrado, Vilasantar, Boimorto, Arzúa, O Pino e Santiago de Compostela, onde entronca co Camiño Francés á altura da cabeceira do aeroporto de Lavacolla.

E, pola súa banda, o trazado do Camiño Primitivo, ao seu paso por Galicia, discorre por un total de nove concellos: A Fonsagrada, Baleira, Castroverde, Lugo, Guntín, Friol, Palas de Rei, Toques e Melide, onde finalmente entronca coa ruta principal do Camiño de Santiago: o Camiño Francés.

Galicia incrementa así a súa nómina de declaracións, que até o día de hoxe incluía xa á cidade vella de Santiago de Compostela, elixida en 1985; o Camiño de Santiago Francés, inscrito en 1993; a Muralla romana de Lugo recoñecida no 2000; e a Torre de Hércules, que alcanzou a súa inclusión no 2009.