Os socialistas de Cervo alégranse de que Villares abra por fin as portas do Concello aos gobernos da Deputación de Lugo

Cervo, 14 de xullo de 2015.- O Grupo Municipal Socialista de Cervo asegura que o equipo de goberno está demostrando á vista de todos os veciños que “durante estes últimos catro anos, fomentou de maneira voluntaria e interesada unha mala relación e enfrontamento cara a Deputación de Lugo única e exclusivamente por intereses políticos”.

Dende o Concello de Cervo xamais vimos mostras positivas de colaborar e traballar en conxunto coa administración provincial a pesares de todas as facilidades ofrecidas, “todo o contrario, entorpeceron canto puideron todas as iniciativas. Lembramos que cando a Deputación Provincial enviou as máquinas para o arranxo de diferentes estradas, o señor alcalde, Alfonso Villares, non lles permitiu circular polas vías municipais porque se deteriorarían, mandounas directamente para as vías forestais, que ademais non se ven”.

Os socialistas cren moi positivo que “por fin o señor Villares comece a abrirlle as portas do Concello aos gobernos da Deputación Provincial”, chegando incluso a poñer á súa disposición o persoal municipal. “Iso sí, que aclare entón públicamente cal é o motivo real deste cambio de actitude se non é que anteriormente non había en Lugo un goberno “amigo”.

Remataron dicindo que “as administracións públicas deberían estar por riba de calquera interese partidista, pero parece que o PP de Cervo non entende desta maneira a política”.