Luis Rancaño consegue unha altísima puntuación en Vilachá

A clasificación séguese apretando por arriba na categoría sénior masculina da Tirada de Bolos de Xove aínda que Rafael segue mantendo unha pequena vantaxe grazas á súa regularidade, xa que é o único xogador que ata o momento puntuou en tódalas tiradas e só baixou do cuarto posto nunha ocasión.

Sócrates continúa segundo, pese a non puntuar, seguido moi de preto por Moisés Rodríguez, Francisco Pérez e Luis Rancaño, este último grazas á extraordinaria tirada realizada, conseguindo unha puntuación altísima de 355 tantos.

Liga Sénior Feminina
Grazas á mala tirada de Belén Meitín, Salomé Cardoso consolídase na cabeza, ampliando a súa vantaxe a 11 puntos. Na terceira posición unha veterana, Salomé Bermúdez, que con 22 puntos está abrindo brecha coas súas inmediatas perseguidoras.

Salomé non partía a priori entre as principais favoritas, pero a vitoria obtida na primeira tirada de Lago deulle moita moral e está realizando unha campaña moi regular na que xa acumula 2 vitorias. Pola súa parte, Carmen Corral segue arrastrando molestias físicas polo que o seu xogo está moi por debaixo do seu potencial.

Liga Sub 16
Vitoria unha vez máis, e xan van sete seguidas, de Daniel Alonso, que está a dar un paseo militar no campionato. Nos seus tanteos xa se está a comparar cos seniors permitíndolle aprender para a vindeira tempada na que, seguramente, subirá de categoría. Estamos ante dun xogador, que pese á súa xuventude, xa podería competir na Liga Sénior con moitas posibilidades de estar nos postos de vangarda.

Por detrás, Miguel López, ubicado en terra de ninguén, sen ninguén que o presione, ocupa a segunda posición. Para o terceiro posto temos a tres xogadores mozos: Javier Alonso (13 puntos), Julia López (11 puntos) e Hugo Pérez (9 puntos) que seguramente pelexarán ata o final polo terceiro posto no caixón dos vencedores.

A vindeira tirada terá lugar no Centro Social de Morás, o vindeiro sábado 21 de novembro de 2015.