Cervo, 7 de decembro de 2015. O Concello de Cervo, a través da Concellaría de Medio Ambiente, acaba de poñer en marcha a terceira campaña de compra conxunta de árbores, que permite aos veciños facer encargos conxuntos e aforrar deste xeito na adquisición. Hai máis de 80 especies forestais, froiteiras e ornamentais para escoller e boa parte delas son autóctonas, segundo destacou a concelleira de Medio Ambiente, Manuela Méndez. As solicitudes poderanse facer entre o 14 de decembro de o 15 de xaneiro.
“Dende o Concello de Cervo imos abrir de novo a campaña para a compra conxunta de árbores, para que todos os veciños se reúnan e poidan mercar as árbores dunha maneira moito máis económica e así potenciar as pequenas plantacións domésticas. Poderán escoller entre máis de 80 especies, a maioría delas autóctonas. É a terceira campaña que fai o Concello de Cervo para a compra colectiva de árbores. É unha iniciativa coa que administración local quere seguir fomentando as plantacións, máis aló dos terreos municipais, poñendo especial énfase nas autóctonas. De feito, pódese escoller entre máis de 80 especies de plantas tanto forestais como froiteiras ou ornamentais”, explicou a concelleira Manuela Méndez.
A edil engadiu que “o prazo para facer estas solicitudes abrirase o próximo luns, 14 de decembro, e manterase ata o 15 de xaneiro. As persoas interesadas poden poñerse en contacto co Concello de Cervo, onde se lles facilitará a folla de pedidos e a listaxe de todas as especies dispoñibles. Ao tratarse dun encargo conxunto, o prezo das plantas será máis económico que nas compras individuais e por iso queremos fomentalo. Esta acción de compra destas árbores desenvólvese xunto a unha empresa de xardinería para dar facilidades á hora de crear pequenas plantacións domésticas e favorecer o entorno verde no noso municipio. Esperamos que se apunte moita xente”.