O PSOE defende que as cotas á seguridade social e os impostos dos autónomos deben establecerse en función dos seus ingresos

O Valadouro, 17 de decembro de 2015.- O candidato ao Congreso, Iago Fernández, adiantou este xoves que os socialistas defenden que as cotas á seguridade social dos autónomos deben ser trimestrais en lugar de mensuais para axeitarse mellorar ás actividades estacionais; que estas deben establecerse en función da súa facturación, ao igual que os impostos, que tamén teñen que estar vinculados aos seu nivel de ingresos.

Iago Fernández avanzou que estas son algunhas das medidas que o PSOE incorporou ao programa electoral nunha clara defensa dos autónomos, “piar fundamental da economía da nosa provincia”, así como do emprendemento como saída laboral.

Así o explicou nun encontro con novos emprendedores que están a piques de rematar a súa formación na primeira escola pública e gratuíta de horticultura ecolóxica de Galicia, que os gobernos socialistas na Deputación e no Valadouro puxeron en marcha neste Concello mariñao, para seguidamente poñer en marcha os seus negocios. Neste senso, Iago Fernández tamén explicou que o PSOE propón reducir os trámites e custos administrativos para a creación de novas empresas, facendo posibles que están se constitúan en poucos días.

Iago Fernández destacou que “é necesario avanzar cara o modelo doutros países da Unión Europea. Por exemplo, en Holanda, Francia ou Inglaterra a cota mínima dos autónomos é de 12 euros mentres que en España ascende aos 265 euros ao mes. Non é xusto que un autónomo que ingresa 3.000 euros ao mes pague o mesmo que ao que ingresa 500. A substitución da cota fixa para autónomos por cotas flexibles é unha medida imprescindible para protexer e manter miles de empregos, así como para xerar outros novos ao facilitar o emprendemento”.

O candidato salientou que a escola de horticultura ecolóxica do Valadouro é un claro exemplo da aposta do PSOE polo emprendemento como saída laboral. Dende a súa posta en marcha, recibiron formación 20 persoas, das que o 50% puxeron en marcha ou seus negocios ou están a ultimar os trámites para poder facelo. De feito, Iago Fernández visitou nun deles, xunto ao Alcalde do Valadouro, Edmundo Maseda, o Presidente da Deputación, Darío Campos, e a Deputada de Medio Ambiente, Sonsoles López Izquierdo.

Propostas do PSOE en apoio ao emprendemento e aos autónomos
Iago Fernández apuntou algunhas das medidas que o PSOE leva no seu programa en apoio ao emprendemento e aos autónomos:

-Unha medida de “segunda oportunidade” para os autónomos aos que non lles foi ben no seu primeiro proxecto, para que poidan beneficiarse de novo dos incentivos e apoios aos novos emprendedores, incluída a financiación de organismos, como os créditos ICO.

-Reestruturar o pago das cotas de maneira que poda facerse de xeito trimestral para axeitarse mellor ás actividades estacionais ou temporais.

-Reformar o sistema de pago de impostos pola actividade económica, establecendo un sistema de retención máis vinculado ao nivel de ingresos, e diminuíndo a retención nos tramos de ingresos máis baixos.

-A implantación dunha “Execedencia para emprender”, que animará a dar o paso aos traballadores que desexen emprender, mantendo a reserva do seu posto de traballo durante un tempo.