O pleno extraordinario da Corporación Municipal de Cervo rexeitou as alegacións presentadas polo PSOE ao presuposto do Concello para 2016

Cervo, 17 de decembro de 2015.- O pleno extraordinario da corporación municipal de Cervo celebrado este xoves rexeitou as alegacións presentadas polo PSOE ao presuposto do Concello para o vindeiro ano 2016. O alcalde, Alfonso Villares, destacou que este orzamento aposta polo emprego, polos servizos sociais e polos investimentos.

O rexedor municipal explicou que no pleno deste xoves “houbo que resolver unhas alegacións que formulou o Partido Socialista, que foron a súa resposta ante uns presupostos que aprobamos xa hai máis dun mes nun pleno no que o PSOE estivo calado e non dixo nada deste asunto e agora presentou unhas alegacións o último día. Fixérono por dicir que van facer algo con respecto a estes presupostos e para posicionarse en contra, porque realmente teñen moi poucos motivos. E así xa o expuxemos nós no seu momento cando presentamos estes presupostos, porque falamos duns orzamentos do Concello de Cervo nos que duplicamos os fondos destinados ao emprego e somos pioneiros en moitos plans de formación e de emprego para a nosa xente. Ademais triplicamos o diñeiro que se investiu con respecto a este ano en investimentos, cunha cifra próxima aos 900.000 euros. E a maiores de todo isto soben os partidas que se invisten en educación, en servizos sociais, en cultura e en deporte, cun incremento medio do 30 por cento respecto a este ano. E estas cifras superiores, como xa explicamos no seu momento, son debidas a que nos anteriores presupostos fixemos unha política de amortizar os préstamos que tiña o Concello de Cervo, que xa viñan de hai bastantes anos”.

Alfonso Villares engadiu que “os datos están aí para contrastalos e ante iso hai moi pouco que dicir. Naquel pleno o Partido Socialista non dixo absolutamente nada, como puideron comprobar os que asistiron a esa sesión, e hoxe presentaron uns presupostos nos que din que queren aumentar en moitas cousas, cando nós xa fixemos uns orzamentos que cubren as necesidades e as cuestións polas que aposta o goberno de Cervo nestes anos, que son basicamente o emprego e os servizos sociais, a maiores do investimento”.

O alcalde tamén considera que con este orzamento municipal para 2016 “podemos seguir aumentando as cifras de emprego no noso concello. E tamén é importante recordar que, segundo os datos estatísticos que se publicaron en setembro deste ano, temos unha cifra dun 11 por cento de paro, que está por debaixo doutros concellos, como por exemplo os de Ribadeo, Burela e Viveiro, que teñen unha cifra media dun 15 ou 16 por cento. Pero nós por ese 11 por cento de desempregados vamos seguir traballando e desde o Concello de Cervo puxemos as ferramentas presupostarias necesarias para minorar esa cifra de desemprego. En cambio outros concellos, que están gobernados polo Partido Socialista, non fan nada nese sentido”.