Obradoiros, actividades e espectáculos variados por toda a provincia de Lugo da man do programa “Nadal Cultural”

Lugo, 17 de decembro de 2015. O nacionalista Xosé Ferreiro, Delegado de Cultura da Deputación de Lugo, presentou este xoves aos medios de comunicación os contidos do “Nadal Cultural”. Trátase dun programa que, un ano máis, encherá de múltiples e variadas actividades este período non lectivo para as e os máis pequenos da casa, aínda que, coma sempre, haberá tamén propostas para o público adulto.

A programación presentada hoxe vén a completar o conxunto do programa “Nadal Cultural” da Área de Cultura da Deputación de Lugo, que xa puxo en marcha “Títeres no Nadal”, que se está a desenvolver desde comezos do mes de decembro nos centros de ensino da provincia, os obradoiros infantís que xa foron presentados tanto na Rede Museística, onde xa se están a desenvolver cun notable éxito de participación, e os obradoiros que se realizarán no CENTRAD, onde comezan o vindeiro luns 21 de decembro e xa están cubertas o total de prazas ofertadas,

Ferreiro remarcou que a Área de Cultura “volve ofrecer unha intensa programación cultural pensada para todos os públicos e, por suposto, aberta e gratuíta para quen estea interesado nela”, sinalou.

Mostra de artesanía ‘FEIREANDO’ para “poñer en valor o traballo das e dos artesáns da nosa provincia”

O responsable provincial desgranou o programa, no que destaca nesta ocasión a mostra de artesanía “FEIREANDO…polo Nadal” que terá lugar na Praza de San Marcos do 22 de decembro ao 5 de xaneiro. “Con esta mostra queremos poñer en valor o traballo das e dos artesáns da nosa provincia” sinalou Xosé Ferreiro.

A apertura de ‘FEIREANDO’ terá lugar o martes 22 de decembro ás 11:30 horas coa música e voces de Pablo Pintor e Branca Villares e contará cun total de 9 postos de artesanía que poderán visitarse durante todo o Nadal en horario de 11 a 14 horas e de 16 a 21 horas (a excepción dos festivos do 25 de decembro e 1 de xaneiro, que permanecerá pechada)

Completarán as actividades de ‘FEIREANDO’ as demostracións de artesanía que realizarán os propios artesáns e artesás, que terán lugar os mércores e sábados ás 17 horas. Así mesmo, haberá tamén actividades para animar esta mostra da artesanía con “Rodesindo da Barrosa. O Afiador” con Pepe Penabade, que realizará dous pases o 22 de decembro, ás 13 e ás 17:30 horas, e tamén o 28 de decembro ás 17:30 horas animará ‘FEIREANDO’ o Cé Orquestra Pantasma.

Cantos de Nadal, Nadal Miúdo e moitas máis actividades para todos os públicos

“Por sexto ano consecutivo, volve incluír os Cantos de Nadal, no que as panxoliñas interpretadas por once corais locais inundarán de música as rúas e prazas da cidade de Lugo”, sinalou. (Ao final da nota inclúense os horarios e días das actuacións).

Outra das grandes iniciativas é o Nadal Miúdo. “O Nadal estará presente na programación par ao público infantil, coa actuación das Maimiñas con “O soño de Zalo” o martes 29 de decembro ás 17 horas na Sala de Exposicións do Pazo de San Marcos, co obradoiro “A lanterna máxica” o luns 4 de xaneiro con dúas sesións: de 10 a 13 horas para un grupo de 20 cativas/os de 6 a 9 anos, e de 16 a 19 horas para un grupo de 20 cativas/os de 10 anos en diante”. Sinalou Ferreiro.

O Nadal Miúdo completarase coa xa tradicional visita do Apalpador, acompañado do seu burriño e dun grupo de gaitas, o 24 de decembro ás 17:30 horas polas prazas céntricas de Lugo. Así, o Delegado de Cultura reivindicou esta figura tradicional do Nadal galego, que ilustra toda a imaxe gráfica do “Nadal Cultural”, diante das figuras exportadas de fóra: “Non fai falta que as e os nenos da provincia de Lugo e de Galiza recorran a Papá Noel e aos Reis Magos, que teñen que vir dende moi lonxe. Aquí ao carón, nas nosas montañas de Lugo, temos ao Apalpador para cumprir cos seus desexos e comprobar que están ben alimentados despois da cea de Noiteboa”, comentou Ferreiro.

Finalmente, Ferreiro indicou que “tamén haberá unha serie de actividades dirixidas ao público adulto coa actuación de Fran Rei, Isabel Risco e Pedro Brandariz con ‘Falar sen cancelas’ que terá lugar o luns 21 de decembro ás 20 horas na Sala de Exposicións do Pazo de San Marcos. Do mesmo xeito, na Capela de Santa María presentaremos o disco ‘Pito galego’ de Efraím Díaz o 23 de decembro ás 20 horas; o 27 de decembro ás 19 horas teremos connosco a Pres de Cambrai e a Charo Pita con “O segredo do Pergamiño Vindel. 100 anos de música para as cantigas de Martín Códax” e o 30 de decembro ás 20 horas teremos connosco a ‘Il Combattimento’ con ‘O cornetto, a voz do Seiscento’ concluíu o Delegado de Cultura.