O PP pide o voto dos indecisos “para manter un país e unha comarca con máis oportunidades”

Alfoz, 18 de decembro de 2015.- O candidato número dous do PP de Lugo ao Congreso, Jaime de Olano, pediu o voto aos indecisos porque “temos a oportunidade de seguir crecendo e creando emprego, e esa oportunidade, dixo, só se mantén cun goberno do PP”.

“Estou convencido de que, tras esta campaña, tras comparar proxectos e xestión, moitos acabarán metendo a papeleta azul na urna”, engadiu.

O popular explicou que nestes últimos días de campaña se están esforzando por “conectar con todos aqueles votantes aos que aínda non convencemos, intentando dar resposta ás súas principais dúbidas e reticencias á hora de decantar o seu voto polo noso partido”.

“O obxectivo do Partido Popular é recoller dúbidas, presentar feitos e argumentos que axuden aos cidadáns a decidir darnos a súa confianza, depositar no PP o sentido do seu voto”.

No mitin de peche de campaña que tivo lugar en Alfoz, Jaime de Olano dirixiuse a distintos colectivos: aos pensionistas que aínda non decidiron o seu voto para “que recorden que o PP subiulle as pensións todos os anos”; ao máis de un millón de persoas “que atoparon traballo e que están indecisas, para que recorden que esa oportunidade de traballo que atoparon foi grazas ao Goberno de Rajoy”, e aos parados que aínda non teñen claro a quen apoiar, para “que recorden que co PP créase emprego e que co PSOE créase paro”; aos mozos “que atoparon traballo e que están indecisos, xa que grazas ao PP hoxe hai 58.000 mozos menos no paro”, e aos autónomos que non decidiron o seu voto, para “que recorden que o PP puxo máis de 35 medidas para axudarlles” e “hoxe hai 100.000 autónomos máis que na época de Zapatero”.

Balseiro: O único voto útil para A Mariña é o do PP
Ademais, o coordinador de campaña dos populares lucenses, José Manuel Balseiro, pediu que “quen queira que o PP goberne que vote PP, que non vote a outras opcións” porque, segundo advertiu, “ao día seguinte das eleccións van a formalizar un pacto de perdedores para quitarnos do goberno”.

Na mesma liña, asegurou que neste momento se precisa de experiencia, un goberno estable e capacidade de tomar decisións. Queremos que as eleccións as decidan os españois e non os partidos políticos ao día seguinte nos despachos”, advertiu.

“Penso sinceramente que nestas eleccións de 2015 está en xogo que a tarefa destes catro anos continúe e renda aínda máis froitos ou se perda todo o conquistado. Os partidos de esquerda quéreno anular todo e sabemos que se teñen a oportunidade, así o farán”

“Ninguén discute que hoxe España está mellor que fai catro anos: virou economicamente e estamos no camiño claro, evidente, da recuperación.E é verdade que aínda non chegou a todos os sitios. Xa sabemos que temos catro millóns de parados. Pero cando chegamos tiñamos seis. E claro que a economía ten que crecer máis . Pero hoxe España é o país que máis crece da UE. Sabemos que aínda queda moito por facer. Pero se valeron a pena estes catro anos. Non estiveron exentos de esforzos. E por iso pido non interromper o traballo feito”, rematou.