A Mariña preséntase en FITUR coma unha comarca “chea de contrastes” entre a costa e o interior

Madrid, 21 de xaneiro de 2016. A Mariña presentou a súa oferta turística este xoves nun acto desenvolvido en Fitur. O presidente da Mancomunidade, Alfredo Llano, apostou polo turismo slow nunha comarca chea de contrastes, que se poden atopar e gozar nos 16 concellos que a conforman: oito de costa e oito de interior.

Llano dixo que “tivemos aquí en Fitur a presentación da Mariña como destino turístico, da Mariña como parte global de todo un conxunto de concellos que formamos a Mancomunidade. Explicamos por qué razón pode ir a xente á nosa comarca. Defendemos o turismo sostible, o turismo natural, o turismo ecolóxico e o turismo non agobiante, sen masificacións. A Mariña como destino turístico vai ser cada vez más importante, porque ten moito que ofrecer: 8 concellos costeiros e 8 de interior, e no seu conxunto ofrecen unha variedade moi importante de atractivos”.

O presidente da Mancomunidade considera que “hai que defender o turismo de calidade. Falamos da riqueza gastronómica da nosa comarca, da calidade dos nosos produtos, tanto da pesca como dos procedentes da agricultura ecolóxica, que está a ser pioneira e moi importante na Mariña. Tamén falamos do turismo deportivo, do turismo familiar, do que se pode achegar á nosa comarca a gozar de rutas de sendeirismo, de artesanía ou da práctica dos deportes náuticos. Queremos que vexan a Mariña como algo natural, non sufrimos masificacións e temos moito que ofrecer. Somos terra de contrastes impresionantes”.

Para Alfredo Llano “o que importa é que vexan a vida tal e como é, que poidan ir a un porto e ver como atraca un barco, como se descarga o peixe, como se pesca, como se poxa, por exemplo. Defendemos a Mariña, máxica por natureza si, pero como algo único”.