O BNG Alfoz-Valadouro reitera a súa postura histórica favorábel á unificación dos dous concellos “sempre e cando a poboación así o decida democraticamente”

O Valadouro, 17 de marzo de 2016. O BNG Alfoz – Valadouro funciona como unha única asemblea desde a súa creación, sendo polo tanto a única organización política con implantación no territorio que non ten dúbidas sobre as razóns históricas e sociais para traballar na unificación dos dous concellos nun só, e comezou a divulgar a convenciencia da unificación na década dos ‘90. Desde a asemblea local advirten que “o proceso debe ser democrático e con garantía de viabilidade, non imposto desde a Xunta para que Feijóo sacase unha foto, como vén sucedendo con fusións recentes na Galiza”.

Estudo de viabilidade e proceso democrático, participativo e sen imposicións
O Tte. de Alcalde de Ferreira, Eduardo Chao, adiantou que o seu grupo reclamará cunha iniciativa “que se cumpra o acordo unánime da corporación de 2011 no que o seu grupo reclamou á Xunta e á Deputación a realización dun estudo de viabilidade dos dous concellos como paso previo á apertura dun proceso democrático onde a poboación dos dous concellos, con coñecemento de causa, deberá opinar”.

Non cabe actuar con demagoxia, débese traballar en evitar duplicidades e mancomuncar servizos
Chao advertiu que “debemos ser realistas, coas cifras de poboación na man non se pode xogar á demagoxia. A suma dos censos de Ferreira e Alfoz hoxe non chega a 5.000 habitantes polo que a posíbel fusión nin sequera permitiría aumentar de categoría e polo tanto incrementar ingresos doutras administracións”. Neste sentido, insistiu en que “mancomunar servizos e evitar duplicidades é fundamental, e lembrou que para isto debera servir a mancomunidade que existía entre os dous concellos que PP e PSOE disolveron co voto en contra do BNG”.

Precaución ante intereses bastardos e personalismos
Por outra banda, no BNG consideran que a “unificación é unha materia que xamais debe empregarse como catapulta para intereses persoais ou para garantir a atención dos medios de comunicación, xa que todos sabemos que nestes momentos calquera cuestión relacionada coas fusións municipais convértese en noticia de portada; por iso mesmo convén non banalizar, porque se unha cuestión tan importante para o noso Val acaba sendo tratada á lixeira ou utilizada con intereses miserables, a poboación pode acabar evitando ou mesmo rexeitando o debate, por desconfianza”.

“O PSOE de Ferreira debería revisar de cando en vez o acordo de goberno.
O Tte. de Alcalde de Ferreira lembrou que unha das condicións negociadas co PSOE para formar goberno neste mandato, foi traballar na eliminación de duplicidades e mancomunar servizos con Alfoz, algo que á vista dos feitos non se está a facer”, rematou Chao.