O Concello de Viveiro aprobará no vindeiro Pleno a ordenanza da taxa de caixeiros nas rúas proposta por Son Viveiro

O vindeiro mércores día 6, terá lugar o Pleno ordinario correspondente ao mes de abril no que se aprobará definitivamente a Ordenanza proposta por SON VIVEIRO o 7 de outubro de 2015 mediante unha Moción, que contou co beneplácito da totalidade da Corporación nestes termos:
Primeiro: Elaborar e aprobar a ordenanza fiscal reguladora da taxa pola instalación de caixeiros automáticos nas fachadas dos inmobles con acceso directo desde a vía pública e que na mesma se fixe unha cota de 3000 € anuais por cada caixeiro instalado.

Segundo: Que non se aplique ningunha exención.

Terceiro: Que a súa elaboración e posterior aprobación teña carácter urxente para, así, aplicar dita taxa no vindeiro exercicio.
Malia a aprobación da Ordenanza proposta polo noso Grupo, este canon municipal non poderá ser aplicado ata o 2017 por mor da demora na súa elaboración.
Co exemplo doutros municipios, amosamos a perfecta viabilidade a aplicación deste imposto se existe vontade política:

“Con nove caixeiros automáticos que existen en Viveiro con acceso directo á vía pública, o Concello podería recadar 27.000 euros ao ano. Pese a que unha sentenza do Tribunal Supremo avala que os Concellos lles cobren ás entidades financeiras polos mesmos desde o 11 de febreiro do 2009 e contar Viveiro cunha poboación que supera os 16000 habitantes, o noso Concello non recadou por ese concepto un só euro mentres vilas como Ribadavia ou O Carballiño, gobernadas polo PSOE e cunha poboación menor que a nosa -5000 e 14000 habitantes, respectivamente-, ingresan dende hai tempo 2920 euros por caixeiro ao ano e foi precisamente o propio PSOE no Carballiño o que pediu que mesmo se subise dito imposto ata os 3600 euros anuais, polo que non dubidamos de que tanto o equipo de goberno como a oposición apoiarán a proposta de 3000 euros anuais proposta pola nosa formación”, manifesta Marcos Besada, Edil de SON VIVEIRO, quen, nas súas alegacións, defende que as máquinas dispensadoras automáticas situadas nas vías públicas ocupan un espazo que aos bancos lles sae de balde.

Tamén quere chamar a atención sobre o agravio comparativo existente con respecto a bares, restaurantes, comercio e pequenas e medianas empresas, que custean outras tarifas por ocupar a vía pública aínda dispoñendo duns ingresos e beneficios inferiores aos das entidades de crédito.

“Os organismos financeiros ostentan unha importante carga de responsabilidade na crise actual e, malia a teren sido rescatados con cargo ao erario público, continúan executando desafiuzamentos, restrinxindo o crédito, aumentando as comisións e recortando o seu cadro de persoal, razón pola que nos parece xusto que os bancos paguen oito euros diarios; é un canon axustado ao beneficio que obteñen mediante o cobro aos seus usuarios e usuarias e unha medida para aumentar os recursos municipais sen penalizar ao contribuínte medio”.