Foz, 13 de abril de 2016.- O Concello de Foz e madeireiros que traballan no municipio chegaron un acordo para reparar os danos causados nas vías municipais pola tala de árbores, sen que os empresarios teñan que poñer avais previamente. Foi na reunión celebrada este martes coa participación do alcalde, Javier Jorge Castiñeira; o primeiro tenente de alcalde, Pedro Fernández Manín; a concelleira socialista Vanina Cabrera; a voceira do BNG, Lorena Seivane, ademais da técnico de Medio Ambiente do Concello e representantes de empresas madeireiras.
O alcalde focense explicou que “ foi unha reunión importante convocada polo propio Concello co obxectivo de tratar de resolver o conflito ocasionado nas vías e camiños municipais, algo que xa se tratou no pleno pasado da corporación, porque existe un malestar por parte dos veciños, moitas veces tamén propietarios, polo estado no que quedan as vías despois das diferentes talas. Despois de dous anos e medio de funcionamento da ordenanza percíbese desde o Concello que se está a volver a condutas pasadas por parte das empresas madeireiras. Houbo unha baixada da intensidade á hora de solicitar os permisos e desa coordinación necesaria co concello; e así se lles comentou aos madeiristas”.
Javier Castiñeira subliñou que “a reunión tivo dúas partes: unha na que Concello e madeiristas mostraron esas discrepancias e na que nosoutros amosamos ese desencanto polo estado no que están as pistas; e os madeiristas queixáronse da falta de flexibilidade que ten a ordenanza, que segundo dixeron, leva a que sexa moi difícil de cumprir, sobre todo no referido aos avais, porque lles supoñen un gasto financeiro elevadísimo, pois teñen que presentalos en todos os concellos nos que estean traballando. Iso limita as súas posibilidades financeiras para facer outro tipo de investimentos na propia empresa e polo tanto quéixanse do que é a solicitude cos avais. Nese senso ao final, despois de que todos formulásemos as nosas discrepancias, chegouse a un acordo importante, que é valorar por parte dos servizos municipais os danos que hai a día de hoxe nas vías que se usaron para facer talas, tratar de facer un convenio entre todos para arranxalas e deixalas o mellor posible durante os próximos meses. Por outro lado imos tratar de buscar un compromiso por parte de tódolos madeiristas de que van facer as solicitudes de talas para que o Concello teña a maior posibilidade de control e, por outro lado, que se fagan cargo desas pequenas reparacións nos viarios”.
O rexedor focense tamén anunciou que “afondaremos tamén durante todo este ano en dúas reunións, unha cada seis meses, e ampliarémolas tamén ás asociacións de propietarios e ás asociacións de veciños para ver como estamos avanzando neste senso e tratar de eliminar esa carga que agora mesmo supón para os madeiristas levar a ordenanza como se debe pola necesidade de presentar avais. Imos dar un marxe de confianza durante un ano e se durante este período este acordo, que propuxeron os madeiristas e que todos entendemos que pode ser interesante con esta confianza que lles imos dar, funciona seguiremos así; e se non loxicamente haberá que aplicar integramente a ordenanza, sexan cales sexan ao final os resultados. Imos tratar de facer o maior seguimento de coordinación entre tódolos afectados e en definitiva o resultado da reunión creo que foi positivo e que mellora novamente as relacións e realza o obxectivo da ordenanza, que non era outro que manter as vías municipais en bo estado e que aqueles que fan os danos sexan os que os reparen”.
Era o único ocupante do turismo e os Bombeiros de Vilalba tiveron que excarceralo. Ao fío das 13:30 horas, un particular informou ao 112 Galicia dun coche que se saíra da vía e acabara batendo contra unha árbore no quilómetro 75 da N-640, en Ludrio (Castro de Rei). O propio alertador sinalou que o accidente semellaba grave polo estado no que quedara o vehículo. Cando chegaron ao lugar, os servizos de emerxencias confirmaron que só había unha persoa implicada,un home que resultou falecido e foi excarcerado polos bombeiros. No operativo participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada.
O director xeral agradeceu aos membros e traballadores da entidade todo o seu labor na defensa dos dereitos dos máis novos. Deste xeito, puxo en valor a súa traxectoria e o compromiso cun modelo integrador e inclusivo no que os menores do sistema de protección vivan nunha contorna totalmente familiar. Neste sentido, Jacobo Rey fixo fincapé na importancia da colaboración entre a Xunta e o tecido social para seguir fortalecendo un sistema que garanta o benestar dos nenos e adolescentes, con centros como San Aníbal que conforman un auténtico fogar.
A alcaldesa Marta Rouco inaugurou a cita, que abriu coa IV Volta Ciclista á Terra Chá e cunha programación centrada na relación entre Galicia e Cuba e na memoria da emigración. Houbo unha mesa redonda sobre o Centro Galego da Habana, a exposición Galicia Imaxinada e música, ademais dunha mostra de xornais antigos. Rouco reivindicou a importancia de lembrar a emigración galega e apelou a mirar con humanidade as migracións actuais, destacando tamén o papel das asociacións culturais das parroquias na conservación das tradicións. A feira continúa con desfile de época, xantar popular, xogos, animación, baile cubano, foliada, queimada e propostas musicais e artesanais ata a noite.
Na IV Festa dos Ovos Rotos con Chourizo e Feira de Artesanía, María José Gómez puxo en valor a importancia económica e social deste produto e o papel da artesanía alimentaria, con sete operadores presentes. Subliñou que o evento consolídase como unha cita que promove a gastronomía galega e recupera oficios tradicionais, dinamizando a vida económica e social de Castro de Rei.
Ocorreu minutos antes das 11:30 horas. Unha persoa foi trasladada ao hospital tras resultar ferida na colisión entre un coche e un autobús no quilómetro 512 da A-8 en sentido A Coruña, en Vilaframil (Ribadeo). Entre os alertadores estiveron as persoas que viaxaban no coche, que puideran saír do vehículo. Por outra banda, o autobús conseguiu deterse uns metros máis adiante. Ao punto desprazáronse Urxencias Sanitarias de Galicia-061, a Garda Civil de Tráfico e os servizos de mantemento da autovía.
O próximo luns 14 de setembro comeza un novo curso de español dirixido a persoas estranxeiras da man de Ecos do Sur, que se desenvolverá ata o 9 de outubro. A formación será dun total de 80 horas e as clases terán lugar de luns a venres, de 9:30 a 13:30 horas no Centro de Formación Ocupacional. O concelleiro de Inmigración, Mario Pillado, destacou o valor destas propostas para “facilitar ferramentas útiles ás persoas estranxeiras residentes no municipio e favorecer a súa integración, tanto social como administrativa”.
Finalizado o encontro, de carácter privado, o Cónsul asinou no Libro de Ouro da Deputación e a Presidenta fíxolle entrega dun agasallo institucional. Trala xuntanza Carmela López manifestou a súa satisfacción porque “traballamos para avanzar en novas vías de colaboración, e en posibles proxectos que serven para reforzar a relación entre a Deputación e o veciño país de Portugal”.
