O Concello de Mondoñedo amplía o prazo de inscrición no I Concurso de ornamentación de balcóns e fachadas

Mondoñedo, 9 de maio de 2016.- O Concello de Mondoñedo amplía o prazo de inscrición no I Concurso de ornamentación de balcóns e fachadas ‘Florea o teu balcón’, dada, segundo o Goberno local, “a boa acollida que está a ter polos veciños”.

O prazo de inscrición estará aberto ata o sábado 28 de maio e os interesados poderán anotarse no portelo de atención ao público da Casa do Concello de Mondoñedo. Deberán indicar o nome, apelidos e DNI do participante, xunto ao enderezo dos balcóns participantes.

O concelleiro de Educación, Mocidade e Novas Tecnoloxías, Alberto García Fernández, explica que o concurso, unha vez remitidos os dípticos informativos coas bases ás vivendas, “está a ter moi boa aceptación, polo que decidimos ampliar o prazo de inscrición ata a véspera do Domingo de Corpus”.

O certame fora presentado pola alcaldesa, Elena Candia, e o edil e ambos explicaron que o que se pretende é a posta en valor dos balcóns como elementos vivos e decorativos da cidade, “porque detrás de cada balcón ornamentado existe unha moi importante contribución cidadá á mellora estética do noso casco urbano, que cobra importancia especialmente coa chegada da primavera e verán”, engaden.

Bases
No certame poden participar todos aqueles particulares que dispoñen de balcóns ou ventás que reúnan as condicións mínimas necesarias para ser decorados ornamentalmente con flores e plantas. O alcance do concurso será o casco urbano da cidade de Mondoñedo, incluíndo casco histórico e os barrios tradicionais de Os Muíños e San Lázaro.
O xurado realizará visitas periódicas nos meses de maio, xuño e xullo e valorará, entre outros aspectos:
– O estado de conservación e mantemento semanal dos balcóns.
– A orixinalidade na ornamentación.
– A variedade e calidade florística.
– A innovación de especies e a colocación de elementos accesorios tales coma xardineiras, colgantes, etc.

Composición do xurado
O xurado cualificador estará integrado por representantes de cinco asociacións de Mondoñedo elixidas a sorteo, un representante da ACIAM, dous profesionais do sector da xardinería e un representante de cada centro educativo do municipio. O resultado do concurso farase público a segunda quincena do mes de xullo, mentres que os premios entregaranse en agosto.

O Concello de Mondoñedo establece tres premios. Un primeiro dotado con 200 euros; un segundo de 150 euros e un terceiro por importe de 100 euros. Todos eles levarán un diploma acreditativo para colocar no balcón galardoado.