Podemos Galicia apoia aos traballadores da conserveira Antonio Alonso que denuncian os seus despidos encubertos

Viveiro, 09-05-16.- Os traballadores da fábrica de Conservas Antonio Alonso de Celeiro levan días saíndo a rúa para denunciar a fraude premeditada que levou a cabo a empresa para xustificar o peche da fábrica e o traslado da produción a planta de Bueu. A empresa servíuse de prácticas coma a compra de peixe da baixa calidade para acadar un balance de perdas económicas.

Para os traballadores o traslado é de feito un despido encuberto de gran parte do persoal de Celeiro, de persoas que levan toda a vida traballando en Celeiro e non poden trasladarse a Bueu. A empresa, aproveitando a reforma laboral e sabendo que a fábrica de Bueu, en realidade, non ten capacidade de acoller a todo o persoal de Celeiro, poderá aproveitarse da figura do despido por causas organizativas.

A secretaria de Equidade e Xustiza Social de Podemos Galicia, entende que a Xunta de Galicia, que beneficiou con subvencións a esta empresa, “ten a obriga de velar polo emprego na Mariña, e porén está a dar as costas aos traballadores”. Tamén teme que podan existir intereses especulativos ante as sospeitas de recalificación urbanística dos terreos da empresa por parte do goberno municipal de Viveiro.

Na Mariña lucense, onde o paro é superior a media galega e intensifícase cada vez máis, o peche desta fábrica, por intereses empresariais, non fai máis que agudizar a situación de precariedade das familias afectadas que non deixan de reclamar un futuro laboral para a súa comarca.

José Luís F. Lamelas, responsable de Traballo de Podemos Galicia acudiu as concentracións e mobilizacións que se levaron a cabo durante a semana.