O alcalde de Burela asegura que a noria instalada na praza do Concello cumpre con todos os requisitos de seguridade

Burela, 2 de xuño de 2016.- O alcalde, Alfredo Llano, rexeita as críticas do voceiro popular, José María González Barcia, sobre a noria instalada na praza do Concello. O rexedor acusa ao portavoz municipal do PP de actuar con maldade e de querer crear mal ambiente entre os veciños e asegura que a instalación da noria cumpre todos os requisitos de seguridade.

Para Alfredo Llano “unha das circunstancias que está chamando moitísimo a atención das nosas festas patronais é a noria que está instalada aquí na praza do Concello. Fíxose aquí para darlle unha singularidade ás festas, para facer unha chamada de atención cun atractivo como é unha noria xigante, que é das máis grandes que hai en Europa hoxe. Puxémola aquí para que todo o mundo tivese a oportunidade de gozar das vistas que desde aquí se contemplan e facer unha cousa novidosa”.

O rexedor dixo que “hai unha serie de críticas que di o señor Barcia, digo e digo ben que di o señor Barcia, non é que o diga o grupo municipal do Partido Popular. O señor Barcia a través das siglas do Partido Popular da a entender e maniféstase tal e como é el persoalmente con tal de crear malestar, de atacar, amosando explicitamente a súa maldade. Non está para beneficiar o bo ambiente dos veciños senón para crear un mal ambiente, crear preocupación”.

O alcalde de Burela declarou que “el que nunca fixo absolutamente nada, nin deu un so permiso de instalación de festas, de comprobación xeotécnica no porto nin noutro sitio. Nunca xamais fixo nada. El non é exemplo de nada e ponse a criticar ademais de mala maneira se a localización da noria ten ou non todos os permisos. En vez de vir aquí e contrastar e ver que exactamente cumpre todos os requisitos, dedícase a xerar mal ambiente nos veciños. Mandou á prensa unha nota que é ridícula, penosa e deixa moi ás claras quen é este señor”.

Alfredo Llano subliñou que “esta noria está perfectamente asegurada. O chan ademais foi moi contrastado, sábese perfectamente como está constituído o chan onde está soportando as 150 toneladas desta noria, sábese a presión que está exercendo por centímetro cadrado, sabemos perfectamente que aínda aguantaría tres veces máis de presión a praza do Concello. Ninguén que sexa responsable como son os xefes desta noria, pode montar algo sabendo que hai algunha dúbida. Aquí non hai dúbida ningunha. Fanse as cousas con rigor, con coñecemento e con toda seguridade. Hai un xefe de seguridade que está verificando constantemente todo. ¿Como se poden facer estas manifestacións tan tristes solo co fin de xerar dúbidas e de molestar?. Di quen é este señor e porque razón está no sitio onde está”.

Finalmente o alcalde burelés animou “a toda a xente a que participe en todos os acontecementos que estes días se van facer, que se queren ver Burela desde arriba poden velo perfectamente dando unha voltiña na noria que non hai ningún problema. Se o señor Barcia quere comprobar a seguridade da noria que veña que o invito eu, págolle unha volta para que vexa que aquí non hai nada preocupante. Iso é o que debera facer el, animar á xente a participar nas festas, animar á xente a participar en todo o que se está a facer este ano con moitísimo sacrificio, con moito interese e traballo detrás, e se deixe de andar dicindo bobadas porque é practicamente o único que sabe facer ultimamente”.