BNG-NÓS arranca a campaña na Mariña co obxectivo de levar ao debate político o dereito a vivir e traballar na comarca

A Mariña, 9 de xuño de 2016.- As candidatas e candidatos da comarca da Mariña que fan parte das candidaturas ao Congreso e Senado do BNG – NÓS, participaron no acto de inicio de campaña na Ribeira fronte á Casa do Mar de Foz.

Na primeira pegada que da inicio á campaña oficial participaron dentro da candidatura ao Congreso a barreirense Montse Porteiro e Xosé Paleo, Presidente do Comité de Empresa de Alcoa e candidato número catro ao Congreso. No mesmo acto estivo o médico Iago Villamil, candidato ao Congreso.

Montse Porteiro, sinalou que “Cada unha de nós vén de distintos concellos con problemáticas diferenciadas e de distintos sectores, aos que trataremos de dar voz por medio desta candidatura que se caracteriza pola defensa inequívoca dos intereses das galegas e dos galegos”.

“A nosa función será trasladar a defensa da comarca e da súa capacidade aló onde corresponda, non deixando que os problemas das nosas veciñas e veciños queden esquecidos e só se lembren desta comarca en períodos electorais”. “traballaremos para que Galiza fale por si mesma, para ter voz propia ao servizo do País e da súa xente. Sen que ninguén máis ca nós nos marque o paso nin decidan por nós. Defenderemos os intereses da comarca e do conxunto da nación como ven facendo o BNG desde fai vinte anos”, afirmaron.

A defensa de vivir e traballar na Mariña, obxectivo principal
O dereito a traballar e vivir na comarca para rematar coa sangría migratoria que expulsou por falta de oportunidades a mais de 3.000 mozas e mozos da comarca anos últimos cinco anos. A reclamación do remate de infraestruturas pendentes, a apertura ao tráfico comercial do dique norte de Morás e o fin do saqueo ao que nos somete a Autoridade Portuaria Ferrol San Cibrao que ingresa aquí mais non reinviste o que recada. Non queremos ver barcos despezados, queremos velos traballando no mar e xerando dinamismo e emprego en terra, queremos seguir contando cun sector agro – gandeiro potente, que poda vivir do seu traballo e un sector forestal puxante e con futuro sen estar sometido á chantaxe das grandes papeleiras.

A Mariña é unha comarca cun gran potencial na xeración enerxética, mais os beneficios non quedan aquí, as nosas empresas e familias non se benefician da nosa capacidade produtiva, polo que reclamamos unha tarifa eléctrica social e galega.

BNG – NÓS seguirá os pasos de quen, por primeira vez hai 20 anos falou de Galiza no Congreso, soportando burlas e ninguneos de quen debera defendela, mais coa dignidade de quen acredita na nosa xente e en que, coa forza do noso pobo, é posible mudalo todo.