Yolanda Rodríguez, subcampioa interprovincial de pistola de precisión

A deportista viveirense Yolanda Rodríguez, actual campioa de España Cadete de Pistola Deportiva e Subcampioa Nacional de precisión, conseguía unha magnífica actuación a pasada fin de semana no Campionato Interprovincial de pistola de precisión, celebrado na vila coruñesa de Carral, organizado polo Club local e a Federación Galega de Tiro Olímpico coa colaboración do Concello.

Yolanda Rodríguez que se estreaba na categoría xuvenil, conseguía o pase á fase final despois das tandas eliminatorias con tiradoras chegadas de diferentes puntos de Galicia, Asturias e Santarder.

A competición pechábase entre Daniela Pérez, do club Hípica, a propia Yolanda do Tiro San Froilán e a súa compañeira de club Adriadna Donlebun. As tres tiradoras non deron opción e só quedaba confirmar como quedaría o podio.

Entre as tres compañeiras da Selección Galega de Tiro Olímpico que disputaron o pasado Campionato de España representando a Galicia, Yolanda fixo unha tirada de menos a máis conseguindo un total de 350 puntos que lle valeron a medalla de prata sendo superada por Daniela Pérez por tan só catro puntos. Un pouco máis atrasada quedaba Adriadna con 340.

De novo as tres tiradoras volveran verse as caras no Gran Premio Nacional “PRINCESA DE ASTURIAS” que se celebra na cidade de Oviedo a finais de xullo onde competirán contra as seleccións doutras comunidades na modalidade de equipos e contra todas no individual. Neste caso, Yolanda Rodríguez representará a Galicia nas dúas modalidades na de pistola deportiva e na modalidade de precisión.

Rodríguez, que estes días está rematando o primeiro curso de Bacharelato no IES Vilar Ponche empezará a intensificar a vindeira semana os adestramentos pasando de 3 días a 6 de traballo en seco e en pistola.